O Mundial de Colchonetas de Sanxenxo adiántase ao 10 de xullo

O evento, que celebra este ano a súa XII edición tras o parón pola pandemia, converteuse xa nun reclamo turístico que adoita congregar á beira de 300 persoas na praia da Panadeira
Saída do Mundial de Colchonetas en 2019. JOSÉ LUIZ OUBIÑA
photo_camera Saída do Mundial de Colchonetas en 2019. JOSÉ LUIZ OUBIÑA

A cita de sol e praia máis agardada do verán sanxenxino regresa este ano á praia da Panadeira máis forte ca nunca. O Mundial de Colchonetas, que o vindeiro 10 de xullo celebra a súa XII edición, despois de dous anos nos que non se puido festexar por todo o alto a causa da pandemia, adiántase por primeira vez na súa historia a principios de mes.

Pero isto, lembrou o presidente da asociación organizadora (O Cubreiro), Juan Pintos, "non é algo que decidamos nós, senón as mareas". E é que na fin de semana de celebración, "ten que coincidir a marea alta entre as 13.00 e as 13.30 horas, para que as colchonetas non batan contra as pedras e sexa posible levar a cabo o concurso". Cabe lembrar que, na última edición, a do verán de 2019, o Mundial tivo lugar un 28 de xullo.

A volta á actividade da que xa se converteu en toda unha atracción turística, e que adoita contar con "visitantes de varios puntos de Galicia que se achegan a Sanxenxo só para participar no Mundial", ademais de resultar todo un atractivo tamén para o turismo estatal e estranxeiro, espertou unha grande expectación ao pouco de que a organización confirmara a celebración prevista para este verán a través das redes sociais. "Nas primeiras tres horas acadamos 1.050 persoas, e nas primeiras 24, 3.200", asegurou Pintos. Neste sentido, prevese unha "grandísima afluencia", que nada terá que envexarlle ás edicións prepandémicas. De feito, asegurou o presidente de O Cubreiro, "a xente xa pedía o seu regreso o ano pasado. Preguntaban moito polo Mundial, e dende a organización estamos con moitísimas ganas", manifestou. En edicións anteriores, o Mundial chegou a reunir na praia da Panadeira á beira de 300 persoas. "Fomos foto de portada dos xornais sete ou oito anos seguidos", lembrou o presidente.

A cita, coma nas edicións anteriores, terá lugar arredor das 12.30 horas, cando se produza a saída da proba, se ben os participantes deberán acudir unha hora antes para realizar a inscrición que, como cada ano, é tamén gratuita.

Comentarios