As probas PCR descartaron casos de coronavirus nun grupo de peregrinos portugueses que este xoves chegaron a un albergue de Vilanova de Arousa, dos cales 13 deles presentaron febre e síntomas compatibles con Covid-19.
Segundo informa a área sanitaria de Pontevedra e O Salnés, estas persoas chegaron ao establecemento sobre as 17.00 horas tras realizar un tramo do Camiño de Santiago. Ao presentar unha temperatura corporal alta, acudiuse no lugar o alcalde, Gonzalo Durán —médico de profesión–, quen xestionou a situación xunto con técnicos de Urxencias Sanitarias-061.
Así, activáronse no albergue os protocolos preventivos anti-Covid por se algún dos peregrinos era un caso positivo. En concreto, desde o teléfono habilitado pola Xunta para cidadáns de fóra de Galicia, déuselles cita telefónica na PAC de Vilagarcía de Arousa.
Desde este centro sanitario contactouse con eles e enviouse ao albergue un equipo que lles tomou mostras para, posteriormente, envialas ao Servizo de Microbioloxía do Hospital Provincial de Pontevedra.
Antes das 23,00 horas da noite, explica a área sanitaria, determinouse nunha primeira valoración que todas as mostras eran negativa en Covid-19, un resultado que sería validado á primeira hora da mañá deste venres.
"Unha vez máis", subliña a área sanitaria de Pontevedra e O Salnés, "os protocolos e a comunicación entre os diferentes niveis asistenciais para a detección de posibles casos Covid funcionaron de forma correcta".
