Lunes. 12.11.2018 |
El tiempo
Lunes. 12.11.2018
El tiempo

"Todos estes nenos teñen interiorizado que compostar é o correcto"

Os nenos foron os encargados de presentar os seus proxectos. O. FERNÁNDEZ
Os nenos foron os encargados de presentar os seus proxectos. O. FERNÁNDEZ

Sete centros participaron este martes no II Congreso Escolar de Educación Ambiental sobre Compostaxe promovido pola Deputación

"Se aos nenos lles custa moito utilizar os composteiros do colexio? Ao contrario. A implicación é total. De feito, o proceso de compostar forma parte das súas rutinas. Nace deles facelo porque xa teñen interiorizado que é o correcto".

Así o explicaban Fátima Mateo e José Manuel Diz, mestres do CEIP Noalla-Telleiro, un dos sete centros educativos que este martes participaron no II Congreso de Educación Ambiental sobre Compostaxe organizado pola Deputación de Pontevedra, co deseño e a supervisión do Ceida, ao abeiro do Plan Revitaliza.

No CEIP Telleiro este é o segundo ano que estamos compostando as merendas e os restos do comedor

Ao longo do curso esta iniciativa percorreu numerosos colexios da provincia para dar a coñecer pautas sobre o manexo dos residuos urbanos e, especialmente, da fracción orgánica do lixo, e este martes foron os propios rapaces os encargados de expoñer os proxectos de compostaxe que están desenvolvendo nos seus colexios e institutos. "No CEIP Telleiro este é o segundo ano que estamos compostando as merendas e os restos do comedor, porque acoplamos o Revitaliza ao que xa viñamos facendo no centro. Todos os días os encargados de cada aula levan o lixo orgánico aos composteiros e o compost que se vai xerando empregámolo na horta do colexio, na que temos cenorias, patacas, acelgas, leitugas e moitas outras verduras", explicaron.

"Ademais de implicarse e concienciarse eles mesmos sobre este proceso, o bo do proxecto tamén é que os cativos transmiten estes valores nos seus fogares. De feito, levaron mostras de compost para as casas e trouxeron plantas para a horta. A Anpa tamén é moi colaboradora. Ademais de compostar, queremos incidir na necesidade de reducir os refugallos", sinalaron os mestres de Noalla.

Os nenos do CEIP Enrique Barreiro Piñeiro de Vilariño involucráronse moitísmo desde o primeiro día e son moi responsables

O CEIP Enrique Barreiro Piñeiro de Vilariño (Cambados) foi outro dos participantes co traballo "Que apostamos a que compostamos?".Segundo precisou a docente Cruz Alonso, alí "os nenos involucráronse moitísmo desde o primeiro día e son moi responsables. Eles mesmos recollen os seus restos das merendas e do comedor e van polas aulas de Infantil facer o mesmo e con moito coidado. Se ven un anaco de papel de aluminio ou calquera cousa así, avisan. Para o ano temos un proxecto de horta escolar no que utilizaremos o compost para completar o círculo".

Ademais, os cativos supervisan os composteiros e estudan a súa microfauna e, co fin de achegar os obxectivos a toda a comunidade, realizaron unha actividade específica para as familias: un estudo estatístico sobre o coñecemento do compost e una campaña informativa para promovelo.

Os alumnos de Sexto do CEP Plurilingüe de Riomaior levaron acelgas cultivadas na horta do centro utilizando o compost para vendelas no mercado escolar

No CEP Plurilingüe de Riomaior (Santa Cristina de Cobres), o nome do seu proxecto xa é un bo resumo do mesmo: "Todos xuntos mellor". Beni Iglesias é a titora de terceiro curso e, segundo sinalou, neste centro "levamos anos traballando sobre este tema". Ademais de reciclar e reutilizar, outro dos obxectivos nos que están concienciando aos alumnos é a redución dos residuos e, para iso, este colexio levou a cabo unhas xornadas de almorzos saudables con produtos naturais e evitando os envasados en plásticos. "A maiores, aproveitando que este cole participa tamén no programa DepoEmprende na Escola, os alumnos de Sexto levaron acelgas cultivadas na horta do centro utilizando o compost para vendelas no mercado escolar organizado recentemente pola Deputación", engadiu a mestra.

O CEIP Ramón de Valenzuela de Bandeira foi outro dos asistentes ao congreso deste martes. A profesora Marga Faílde sinalou que alí o proxecto implica a todo o colexio. "Os alumnos de primeiro e segundo curso traballan sobre a importancia de reciclar papel, os de terceiro crearon un anuncio para promover os obxectivos nas casas, os de cuarto deseñaron un cartel que explica o que se pode meter nos composteiros e o que non, os de quinto estudaron os bechos que se crían nos composteiros, os de sexto emitiron un artigo para publicar na prensa e os de Infantil fixeron un sementeiro de pementos usando o compost. Ademais, temos "patrullas de patio" que, entre outras tarefas, incluso multan a quen tire papeis ou outros refugallos indebidos nos composteiros e fan fotos do ben feito e do mal feito sobre a compostaxe".

A listaxe de centros que tomaron parte no congreso promovido pola Deputación completouse co Colexio Plurilingüe San Fermín de Caldas de Reis, o IES Terra de Turonio de Gondomar e o IES Luís Seoane de Pontevedra. Este último realizou un ensaio sobre dous procesos de compostaxe diferentes para constatar os distintos resultados e optimizar o proceso. O proxecto inclúe a medición de parámetros como o peso, a humidade, a temperatura e outros, así como a toma de conclusións e o aproveitamento didáctico desta información.

"Os cativos, un dos puntais do Plan Revitaliza"
 Os encargados de inaugurar o congreso foron os representantes do Goberno provincial; o director do Ceida, Carlos Vales, e o alcalde de Pontevedra. A presidenta da Deputación, Carmela Silva, e o vicepresidente provincial e impulsor do Plan Revitaliza, César Mosquera, destacaron que os cativos e os mozos son "un dos puntais" do programa de compostaxe. O nacionalista engadiu que "a difusión da compostaxe entre os escolares é un dos feitos máis relevantes deste plan, porque supón actuar nas escolas para o presente e para o futuro".

 

"Todos estes nenos teñen interiorizado que compostar é o correcto"
Comentarios