HOMENAXEAR ás 11.000 mulleres que forman parte da Universidade de Vigo foi un dos obxectivos do acto que, co gallo da celebración do 8-M, organizou onte a institución en Pontevedra.
A Casa das Campás recibiu a unha delegación da UVigo presidida polo reitor, Manuel Reigosa, e que contou coa presenza dos vicerreitores de Pontevedra e Ourense, Jorge Soto e Esther de Blas, e a vicerreitora de Comunicación, Mónica Valderrama, e no que tamén participaron algunhas das científicas da Universidade, así como as representantes da Unidade de Cultura Científi ca e da Innovación que se puxo en marcha hai un ano.
"Este acto é unha maneira de reivindicar o Día Internacional das Mulleres para afianzar o compromiso da Universidade de Vigo coas políticas de xénero e a promoción da igualdade", manifestou a directora da Unidade de Igualdade, Águeda Gómez.
INSIDE OUT. A homenaxe arrincou coa presentación da campaña Bravas. Mulleres da Universidade de Vigo, un "retrato coral, construído desde a pluralidade de miradas femininas" que busca homenaxear "as máis de 11.000 mulleres que integran a Universidade de Vigo", destacou a vicerreitora.
O reitor anunciou o terceiro Plan de Igualdade da universidade
Tal como indicou Mónica Valderrama, con esta iniciativa a Universidade súmase ao "proxecto colaborativo de ámbito global Inside Out, impulsado en 2011 polo artista francés Jean René (JR), e que levou a diferentes colectivos a empregar o espazo urbano para proxectar, a través de retratos a grande escala, as realidades e identidades de persoas e grupos". A campaña está integrada por 18 retratos, agrupados baixo o lema de "bravas", que define "a un grupo de mulleres afoutas e arriscadas e recolle a actitude das mulleres, a súa valentía e traballo diario", salientou Valderrama.
Esta proposta inclúe ademais o proxecto Mulleres [rur]urbanas que levará a cabo a cooperativa cultural 7H, co apoio do Concello e maila UVigo, nos vindeiros días polas rúas da Boa Vila a fin de destacar "a historia das mulleres rurais".
A cooperativa cultural 7H levará a cabo o proxecto [rur]urbanas polas rúas e prazas da Boa Vila
PREMIO UVIGUALA. No transcurso do acto fíxose entrega do Premio Uviguala que desde hai oito anos outorga á Universidade "a alguén que destacou por facer algunha actividade a prol da igualdade entre mulleres e homes".
"Neste caso démoslle o premio por unanimidade á delegación de alumnos de Telecomunicacións, porque foron os primeiros que tiveron a iniciativa de promover os puntos lila na UVigo", engadiu a responsable de Igualdade.
Na entrega do galardón ás representantes da delegación de estudantes de Telecomunicacións, Antía Fandiño e Nerea Dosil, o reitor referiuse ás premiadas como "un exemplo" e animounas á que manteñan a súa implicación coa loita por unha "igualdade real, que aínda queda moi lonxe". Reigosa amosouse "moi orgulloso dunha iniciativa como a dos puntos lila, que está cambiando para ben as festas universitarias", dixo.
Ademais, Manuel Reigosa anunciou que a UVigo presentará en breve o terceiro plan de igualdade, que se abrirá a toda á comunidade universitaria para que se presenten as alegacións pertinentes. Ademais, a vindeira semana, a UVigo presentará en Ourense un estudo do impacto e valoración das políticas de igualdade de xénero na Universidade de Vigo, así como un itinerario virtual de formación en xénero que se levará a cabo a partires do mes de abril e que irá destinado tanto ó alumnado coma ó Persoal Docente Investigador (PDI) como Persoal Administrativo e de Servizos (PAS).
No acto presentouse a publicación Quero ser investigadora, promovida desde a Unidade de Cultura Científi ca e da Innovación, que ten por obxectivo espertar as vocacións científicas entre o alumnado de Secundaria, dándolles a coñecer a traxectoria e ámbitos de traballo de dez investigadoras da UVigo. Julia Armesto, Lola Dopico, Francisca Fariña, Ana Garriga, María Lameiras, Elena Ojea, Lorena Otero, María Concepción Paz, Elena Sánchez e Diana Valverde completan un elenco de dez investigadoras que desenvolven a súa carreira en distintas facultades da Universidade de Vigo. A través da súa experiencia e coa axuda dunha unidade didáctica, preténdese visibilizar a súa actividade e facilitar ó alumnado referentes cercanos no eido da ciencia.
Ademais, a sede da Vicerreitoría acolle desde este xoves a exposición Científicas que contan, dirixida tamén a dar visibilidade ó traballo da muller na ciencia.
Trátase dunha mostra de 13 paneis, impulsada pola vicerreitora de Investigación, Belén Rubio, que pretende ser unha homenaxe a nove "heroínas que loitaron contra moitos obstáculos".