As 342 familias de Pontevedra inscritas no programa Apego veñen de recibir unha comunicación sobre a apertura do prazo para participar nas actividades programadas para este ano. Como en edicións anteriores, todas as actividades son de balde pero con prazas limitadas polo que é preciso realizar a pertinente inscrición antes do vindeiro 7 de abril a través da páxina web apuntate.pontevedra.gal.
O progama Apego, impulsado pola Concellaría de Normalización Lingüística xestionada por Alberto Oubiña, pon en marcha unha nova quenda de actividades dentro deste programa, co obxecto de ofertar actividades educativas e de lecer ás familias que xa teñen fillos e fillas ata 6 anos ou que están agardando un novo membro, para fomentar e mellorar a transmisión do galego como lingua inicial.
Ademais das familias xa inscritas, as que aínda non fagan parte do programa pero dexesen inscribirse poden solicitar unha cita na web www.apego.gal.