Desta vez, a crise sanitaria obriga a modificar parte das bases para participar cunha actividade propia. Deste xeito, tal e como avanzou Alberte Oubiña, concelleiro de Xuventude, as actividades propostas deben poder realizarse tanto de xeito presencial, o aire libre, como a través da web. Con este requisito, o Concello anticípase a posibles medidas que restrinxan as reunións para frenar a expansión do virus.
Como novidade, o próximo ano será preciso realizar inscrición previa para participar nos obradoiros. O que non cambia é o tipo de actividades que se deben propoñer, que terán unha duración de entre unha e dúas horas e, aínda que se poidan realizar varias sesións dun mesmo obradoiro, será preciso que non haxa continuidade para que os asistentes poidan ir a sesións soltas.
A páxina web noitesabertas.gal recibirá as achegas particulares ata o vindeiro 30 de decembro. No mes de xaneiro reunirase a comisión que seleccionará os proxectos. A escolla terá en conta que sexan propostas interesantes para a mocidade, constructivas, lúdicas, participativas e viables online
Alberto Oubiña deu onte algúns dos datos da anterior edición, que tiña un seguimento e asistencia de récord interrompido pola pandemia. Deste xeito, en 2020 presentáronse 152 propostas das que foron seleccionadas 95 para configurar o programa. Por outra parte, ata o momento no que se tivo que suspender Noites Abertas, pasaran polo programa 1.439 persoas, 360 por fin de semana fronte ás 279 da anterior edición, en 2019.
