A compañía galega Aerocamaras, con sede en Lalín e no Parque Tecnolóxico de Galicia -Tecnópole-, foi seleccionada para formar parte do consorcio europeo de empresas, liderado por Indra, que desenvolve o denominado Proxecto Ensure. Este proxecto está dirixido ao control do tráfico aéreo de drons mediante unha plataforma intelixente coñecida como U-Space. Trátase de lograr un control integral do tráfico similar ao que xa existe para as aeronaves de pasaxeiros ou para as embarcacións marítimas, aínda que aplicado ás peculiaridades específicas dos drons.
A experiencia, o coñecemento e a innovación de Aerocamaras, líder do sector dos drons en España, foron os factores decisivos para a súa incorporación ao consorcio, no que, baixo o liderado de Indra, estará acompañada de grandes compañías do sector como Airbus, Unifly, UPM, NLR, Nats, Enaire, Eurocontrol ou Collins Aerospace.
A firma galega encargarase de planificar, supervisar e executar, tanto en Galicia como en Madrid, cos seus propios drons, as probas de operacións reais que se efectúen no transcurso do proxecto. A responsabilidade directa de Aerocamaras sobre unha fase tan sensible e complexa dos traballos débese a que, segundo as condicións que demanda o proxecto, cumpre cos máis altos parámetros de esixencia, tanto pola alta capacidade técnica dos seus equipos de persoal como polo seu dominio das ferramentas máis avanzadas que existen no mercado.
Importancia do desenvolvemento do U-Space
Na actualidade os drons contrólanse de maneira terrestre con visión en todo momento dos mesmos. Coa perspectiva do aumento de aeronaves non tripuladas no espazo aéreo, e a posibilidade de que no futuro poidan alcanzar distancias máis longas, nace a necesidade de crear un control do tráfico aéreo para drons, o U-Space.
U-Space é o conxunto de novos servizos e procedementos específicos que se está a desenvolver de maneira coordinada entre unha vintena de países de Europa para posibilitar un alto número de operacións con aeronaves non tripuladas, especialmente as de maior complexidade, dunha maneira ordenada, fluída, segura e accesible. Prevese que o proxecto remate en 2024 e que o U-Space se poña en marcha en 2025.
Aerocamaras, líder no sector de drons en España
Aerocamaras é a empresa líder de drons referente en España, pioneira no desenvolvemento, formación, vendas e servizos profesionais con aeronaves non tripuladas. Na actualidade lidera o sector da formación como mellor escola de pilotos de drons, avalada por máis de 35.000 alumnos. Conta con centros de formación de pilotos que xa se converteron nunha referencia nacional, con máis de 15 escolas repartidas ao longo de todo o país.
