A cidade de Pontevedra volverase converter nun plató de cine durante o vindeiro mes de agosto coa rodaxe de La sombra de la ley. A oficina da Pontevedra Film Comission xestiona estes días os permisos e trámites precisos para levar a cabo as gravacións na Boa Vila, que terán lugar entre o 23 e o 31 de agosto.
Ademais de Luis Tosar, que protagoniza o filme, o elenco está composto por actores e actrices como Michelle Jenner, Vicente Romero, Ernesto Alterio, Paco Tous e Manolo Solo. Trátase dunha produción de Vaca Films, Atresmedia Cine e La ley del Plomo A. I. E. coa colaboración de Canal Plus e a Televisión de Galicia, entre outros.
Un dos escenarios con máis peso do film será o IES Valle Inclán, que será a Comisaría de policía na que traballan os protagonistas da película
A rodaxe da película comezará nunhas semanas en Barcelona e, a partir do vindeiro mes, trasladarase a Galicia para gravar en localidades como Lugo, Pontevedra e Monforte de Lemos. Así, un equipo formado por 100 persoas estará na cidade con motivo da rodaxe. Entre as localizacións máis destacadas da cidade en exteriores destaca o Paseo de Montero Ríos, na zona da Alameda, onde se gravarán varios planos xerais complexos que recrearán os anos 20.
Para a rodaxe desta secuencia contarase con numerosos figurantes que pasaron o casting celebrado na cidade en xuño. Así, proximamente haberá máis probas de selección para participar no filme, tal e como aseguran os responsables da produción do mesmo. Ademais, os arredores da Alameda encheranse cunha trintena de coches de época ben conservados que permanecerán aparcados no lugar.
Un dos escenarios con máis peso do film será o IES Valle Inclán, que será a Comisaría de policía na que traballan os protagonistas da película (que xira arredor das investigacións para descubrir quen foi o autor dun roubo a un tren militar). Así, segundo os produtores do filme, o edificio onde se sitúa o instituto posúe unha morfoloxía que se adapta perfectamente ás necesidades técnicas da película. Tanto o interior como o exterior do instituto aparecerán reflectidos na película.
"Supón un traballo grande de coordinación e xestión de permisos xa que, ao ser unha película ambientada noutra época histórica hai que poñer moitos máis esforzos nos decorados", explicaba onte o encargado da Pontevedra Film Comission, Miguel López.
A película requirirá a intervención de expertos en efectos visuais para retocar edificios e rúas para adaptalos á época na que ten lugar a trama. O encargado desta tarefa será Félix Bergés, do estudo El Ranchito.
Da mesma maneira, o traballo de decoración, escenografía, vestiario e perruquería é fundamental e para iso contouse cun amplo equipo técnico.
