O tenente de alcalde e concelleiro de Educación, Tino Fernández, achegouse este venres pola mañá ata a Escola de Enxeñería Forestal do Campus de Pontevedra para asistir, acompañado do secretario do centro universitario, José Manuel Casas, á primeira xornada de presentación dos traballos de investigación realizados no marco da IX Feira da Miniciencia Pontenciencia.
Desde as 10.00 horas e ata as 14.30 horas, o alumnado de Primaria (5º e 6º curso) dos dez colexios que participan na modalidade de Ciencia no Cole está a exhibir e defender ante o xurado un total de 18 proxectos experimentais e documentais, mentres que na quenda de tarde, de 16.30 a 19.30 horas, terán protagonismo as 13 investigacións dos nove centros de Secundaria que toman parte na categoría de Xoves Investigadores.
A feira, impulsada pola Concellería de Educación e a Deputación Provincial e financiada a través da 'Convocatoria de axudas para o programa de cultura científica e da innovación' da Fundación Española para a Ciencia e Tecnoloxía (Fecyt) do Ministerio e Ciencia e Innovación, pecharase este sábado pola mañá, nunha xornada na que as 12 familias participantes na modalidade de Ciencia en Familia (alumnos de Primaria de 7 a 12 anos-familiares) presentarán outras 5 investigacións e terá lugar o acto de entrega de premios e diplomas, así como un pincho de confraternización.
Os colexios de Primaria que toman parte na categoría de Ciencia no Cole son: CEIP Santo André de Xeve, San Martiño, Froebel, Marcón, Ponte Sampaio, San Benito de Lérez e A Xunqueira II e os CPR Calasancio, Sagrado Corazón de Jesús de Pontevedra e Sagrado Corazón de Praceres.
Pola súa banda, os centros de Secundaria participantes na modalidade de Xoves Investigadores e que, polo tanto, concorren aos Premios de Investigación 2022 Homenaxe á muller investigadora (cinco galardóns patrocinados por Hifas da Terra, Viaqua, Setga, Marine Instruments e Cristalería Pontevedresa) son: IES Luís Seoane, Frei Martín Sarmiento, A Xunqueira II, Montecelo, Torrente Ballester e Valle Inclán, o CPR Sagrado Corazón de Praceres, o CIFP Carlos Oroza e o CFEA de Lourizán.