Tras enfrontar o tempo revolto ao longo da semana, o ciclo En3vistas, da Concellería de Normalización Lingüística de Pontevedra, trasladouse onte ao Teatro Principal. Os protagonistas da charla, os actores e humoristas Carlos Blanco e David Amor, terían falado coa xornalista Chus Gómez, de non ter sido pola chuvia, no Parque dos Gafos. Finalmente fixérono no teatro, a cuberto, mantendo o acceso limitado e as medidas habituais de seguridade sanitaria. Blanco e Amor falaron da súa experiencia como galegofalantes, do humor en Galicia e das súas respectivas carreiras. O ciclo de entrevistas abertas ao público remata este venres (20.00 horas) con Ortiga e Pili Pampín falando na Ponte do Burgo. De chover, a charla trasladarase de novo ao Teatro Principal.
