Autocaravanistas por todas partes. Esta fin de semana Pontevedra convértese nun punto de encontro para os que viaxan coa casa sobre rodas. A Asociación Galega de Autocaravanas (AGA) celebra un encontro anual coa axenda chea de reunións e asembleas, pero tamén con actividades turísticas pola cidade.
O programa da concentración abrangue toda a fin de semana, pero foi durante a xornada de onte cando se produciron máis encontros. A asociación foi recibida pola concelleira de Promoción Económica e Turismo, Yoya Blanco, no Pazo da Cultura de Pontevedra, onde tiveron lugar as asembleas anual e extraordinaria.
Ás mesmas acudiu o vicepresidente da Xunta e titular de Turismo, Alfonso Rueda, que sinalou o auxe deste tipo de turismo nos últimos anos e sobre todo debido á pandemia.
Deste xeito, os cámpings turísticos nos que poden estacionar caravanas e autocaravanas acadaron este verán máximos históricos de ocupación, con máis de 800.000 noites entre xullo e agosto e máis de 200.000 viaxeiros.
Do mesmo xeito, sinalou que Galicia é un "paraíso para o autocaravanismo" porque ofrece un turismo tranquilo e non masificado en espazos abertos e en contacto coa natureza que se adapta tamén ao modelo de turismo no que traballa a Xunta baseado na seguridade, a calidade e a sostibilidade.
De feito, a mensaxe de Galicia como destino seguro e de calidade foi o que permitiu superar este verán en 25 puntos a ocupación respecto a 2019 e situándose a comunidade galega en agosto como o único destino que superou as cifras turísticas prepandemia.
A concentración do colectivo inclúe tamén visitas turísticas pola cidade, cun paseo guiado polo centro de Pontevedra e rutas en barco pola ría que continuarán ao longo do día de hoxe.
A presenza de autocaravanas na cidade fíxose patente no entorno do paseo do río Lérez e a antiga Tafisa, onde máis dun cento de vehículos permanecen estacionados nestes días.
