Os ollos das palabras: poesía para ver é o título do novo obradoiro de escrita que a Asociación de Escritores/as en Lingua Galega (AELG) realizará en Pontevedra, en colaboración co Concello. O poeta e creador ourensán Baldo Ramos será o encargado de impartilo, centrándose nesta ocasión na poesía visual. Como convidado impartirá unha clase maxistral Xosé Mª Álvarez Cáccamo.
O anuncio da actividade guiada por Ramos coincide cunha exposición súa, Libros con memoria, na cidade. Poderá visitarse ata o 3 de marzo na sala Némonon.
FORMATO ACORDEÓN. Segundo informou o Concello, os asistentes ao obradoiro elaborarán dous proxectos literarios diferentes: por unha banda, un libro obxecto, confeccionado con materiais (poéticos e plásticos) que xurdan do propio taller e, por outra, un libro colectivo, en formato acordeón, con obras dos participantes.
O presidente da AELG, Cesáreo Sánchez, e a concelleira de Cultura, Carme Fouces, presentaron este xoves a quinta edición desta actividade, que se desenvolverá no Pazo da Cultura (seminario 8) entre o 16 de febreiro e o 25 de maio (de 18.00 a 20.00 horas, xoves e venres; e de 11.00 a 13.00, sábados).
O obradoiro, que contará con 25 prazas, está dirixido a persoas maiores de 16 anos. A inscrición é gratuíta e poderá realizarse en [email protected].
O presidente da AELG aproveitou a presentación da actividade para referirse a Pontevedra como "a primeira cidade de Galicia na que hai unha escola estable de creación literaria".
