Tarde frenética de celebracións no campus de Pontevedra, pois neste venres coincidieron catro actos de graduación doutras tantas titulacións.
O primeiro foi o de Dirección e Xestión Pública. O salón de actos da Facultade de Ciencias Sociais e da Comunicación acolleu esta cerimonia, na que recibiron os seus diplomas os 20 integrantes da décima promoción. Tiveron como padriño de honra ao presidente da Federación Galega de Municipios e Provincias (Fegamp), Alberto Varela, e como madriña académica á profesora Soraya Rodríguez. Ademais do decano comisario, no acto interviu tamén Alejandro Virgós en representación do alumnado.
Unha hora despois, nun acto organizado pola Delegación de Alumnos, preto de 80 novos titulados e tituladas en Belas Artes celebraron a súa graduación no Pazo da Cultura. Tiveron como madriña académica á profesora Silvia García. Presentado por Xoel Gómez e Marina Aradas, o acto contou tamén coas intervencións das alumnas Carmen Suárez e Iris Rodríguez.
Mónica Valderrama, vicerreitora en funcións de Comunicación e Relacións Institucionais; e Emma Torres, decana da Facultade de Ciencias Sociais e da Comunicación, asistiron no salón de actos deste centro ao acto de graduación de 84 novos titulados e tituladas en Publicidade e Relacións Públicas, que tiveron como padriño ao profesor Daniel Martí.
Nestes dous casos foi o propio alumnado o encargado de organizar os seus respectivos actos. En Publicidade, de feito, foi unha actividade práctica dos propios estudos.
Quedan varias. A Escola de Enxeñaría Forestal celebrou a graduación dos 25 integrantes da súa novena promoción, que tiveron como madriña e padriño académicos aos docentes Graciela Paz e Óscar González. Á cerimonia, celebrada na propia escola, asistiron Jorge Soto, vicerreitor do campus de Pontevedra en funcións, e Juan Picos, director do centro.
A primeira deste fin de curso fora Fisioterapia e Enfermería, o pasado xoves, a segunda. Quedarán para o 24 de xuño as tres de Ciencias da Educación e do Deporte (Educación Infantil, Primaria e Ciencias do Deporte) e xa para o 1 de xullo, a última desta quenda, a de Comunicación Audiovisual, segundo informou o Duvi.
