O deputado responsable de Innovación e Promoción Económica, Javier Dios, acudiu este mércores ao polígono industrial de Barro, xunto ao presidente da Asociación de Jóvenes Empresarios de Pontevedra (AJE), Pablo Fernández, para o acto de entrega do espazo que lle corresponde a Carlos Conde como gañador do premio Novo Empresario do Ano 2017.
O beneficiario desta nave durante un ano é Carlos Conde, propietario dunha cadea de barberías para homes que abriu o seu primeiro establecemento hai vinte anos. Actualmente conta cunha trintena de barberías en Galicia, Asturias, Castela e León, Madrid, Comunidade Valenciana, Castela A Mancha e Estremadura.
No acto de entrega das chaves, o deputado Javier Dios afirmou que "para a Deputación de Pontevedra é un orgullo poder colaborar en accións como esta de apoio ás empresas".
O premio que obtivo o empresario, que fora anunciado no pasado mes de novembro pola organización empresarial, consistía nunha nave ou oficina no polígono industrial de Barro durante un ano, prorrogable a dous, ademais dun computador persoal, unha bolsa para cursar un MBA, un ano de afiliación a AJE Pontevedra e unha escultura conmemorativa.
ALMACÉN. Pola súa banda, o propietario de Carlos Conde sinalou que "este espazo necesitabámolo porque tiñamos unha nave que xa nos quedaba pequena e virá moi ben para almacenar stock de mobiliario e produtos que empregamos diariamente nos nosos locais".
O Premio Xove empresario do ano, impulsado por AJE Pontevedra, ten por obxectivos promover a cultura emprendedora, a innovación empresarial, a creación de emprego e a internacionalización das pemes, galardoando a aquelas persoas emprendedoras mozas que contribúen a crear riqueza e emprego na nosa provincia. Así, serán obxecto de galardón as ideas de negocio lideradas pola mocidade da nosa provincia e que sexan viables técnica e economicamente.