sábado. 14.12.2019 |
El tiempo
sábado. 14.12.2019
El tiempo

A Cátedra Saramago une 16 entidades de estudos lusófonos na rede Jaricca

Presentación das xornadas internacionais na Casa das Campás. DAVID FREIRE
Presentación das xornadas internacionais na Casa das Campás. DAVID FREIRE
O Campus de Pontevedra acolle ata este mércores as IV Xornadas Internacionais na honra do Premio Nobel portugués

A Cátedra Saramago da Universidade de Vigo (UVigo) vén de crear Jaricca, unha rede internacional que agrupa 16 entidades de estudos lusófonos: as seis cátedras que levan o nome do escritor portugués xunto con outra serie de cátedras, centros de investigación e colectivos. O seu obxectivo, "a creación de sinerxías e de proxectos de colaboración no ámbito dos estudos lusófonos, a través da docencia, da investigación e das actividades culturais", segundo recolle o diario dixital da UVigo (www.uvigo.gal).

Jaricca foi presentada este luns, na Casa das Campás, durante a inauguración das IV Xornadas Internacionais da Cátedra José Saramago, que se celebrarán ata mañá no Campus de Pontevedra e que tratan de poñer en relación a obra e o pensamento do Nobel coas problemáticas sociais e ambientais contemporáneas.

Saramago e os desafíos do noso tempo é o título das xornadas nas que este ano participan investigadores e investigadoras de España, Portugal, Alemaña, Arxentina, Brasil, Israel, Italia, México e Portugal, así como parte dos e as responsables das diferentes entidades que integran a nova rede Jaricca.

"Nesta cuarta edición, queremos destacar a ética do compromiso político e social coa realidade que nos ensinou o autor", dixo o director da Cátedra Saramago, o profesor Burhard Baltrusch, en palabras recollidas polo Duvi. Bastrusch estivo acompañado na inauguración do ciclo pola conselleira de Educación, Carmen Pomar; o alcalde de Pontevedra, Miguel Anxo Fernández Lores; o vicerreitor do Campus, Jorge Soto, e o director da Fundaçao José Saramago, Sérgio Letria.

EIXES. As IV Xornadas da Cátedra Saramago (catedrasaramago.webs.uvigo.gal) artículanse arredor de tres eixes, segundo lembrou Baltrusch e recolle o Duvi. Por unha banda, "a crise climática", tema da conferencia inaugural do escritor, educador, investigador e activista, Grian A. Cutanda, un dos impulsores en España do movemento Extinction Rebellion.

Por outra, "a cuestión da responsabilidade individual", centrada na carta dos deberes e obrigas que a Fundaçao Jose Saramago entregaba recentemente a ONU. O terceiro eixe é a reflexión arredor da "crise sen precedentes das humanidades".

O programa complétase coa obra de teatro 3991: paisaxe sen horizonte, no IES Valle Inclán, e coa estrea das curtas A Desforra e O Embargo, realizadas, a partir de contos de Saramago, por alumnado de Belas Artes.

A Cátedra Saramago une 16 entidades de estudos lusófonos na rede...
Comentarios