Con música e máis música celebrouse este martes en Pontevedra o Día das Letras Galegas, adicado este ano a Florencio Delgado Gurriarán. A primeira actividade da xornada estivo organizada pola Asociación Músico Cultural San Martiño e foi un concerto na Casa Verde ofrecido pola Banda de Música de Salcedo que, nunha das pezas do repertorio, contou coa colaboración do gaiteiro Andrés Lorenzo Castro.
A programación desta entidade continuou pola tarde, ás 18.30, cun concerto coral no que participaron a Coral Polifónica de Salcedo, como anfitrioa, xunto á de Noia, o Coro Samertolameu de Moaña e a agrupación Amigos da Farra.
Finalmente este ano non se celebrou o tradicional acto de homenaxe que adoitaba organizar a Asociación Sociocultural O Burgo na praza de Curros Enríquez.
O que si houbo na Ferraría foi a final do concurso Música nas Letras, promovido pola Concellería de Normalización Lingüística.
O obxectivo do certame, que contou coa participación de cinco agrupacións, foi poñer música e melodías a poemas do escritor de Córgomo dun xeito libre e orixinal. Desas cinco bandas iniciais, o xurado seleccionou tres para participar na final, que foron as que onte desafiaron á chuvia sobre o escenario instalado na céntrica praza pontevedresa. Entre esas tres, a gañadora foi Dabelaii, en segundo posto quedou Haku e o terceiro lugar do podio foi para AT59.