Os traballos para a instalación das aulas móbiles que acollerán o alumnado de Bacharelato do IES Valle Inclán de Pontevedra durante as obras de rehabilitación do edificio comezaron este mércores na avenida de Montero Ríos. Tal como estaba previsto, a operación deu inicio co remate da Gran Final das Series Mundiais de tríatlon en Pontevedra, celebrada durante a pasada semana.
A zona da fachada do IES Valle Inclán xa está acordonada para proceder a instalar as aulas móbiles, e está previsto que a ocupación da vía pública se estenda durante tres días. Posteriormente deberán acondicionarse esas instalacións para acoller o estudantado. Segundo a planificación dada a coñecer durante o verán, o alumnado trasladarase ás aulas móbiles a partir do vindeiro 12 de outubro.
