A Concellaría de Sostemento de Espazos Públicos Urbanos, que xestiona a concelleira Eva Vilaverde, comeza na vindeira semana a executar o plan de rehabilitación integral da capa de rodadura,con actuacións nas rúas Xosé Malvar, Fragas e Palamios. Así, tal e como xa se anunciara, o mércores 17, aproveitando que é día festivo local, 
iniciaranse os traballos en Xosé Malvar que se prolongarán ao longo de tres días.
Como vén sendo habitual, para levar a cabo este tipo obras establécese un plan de tráfico específico. Durante a xornada do mércores, cortarase un carril da rúa Xosé Malvar á altura de Loureiro Crespo, sentido Loureiro Crespo - ponte dos Tirantes, mantendo a circulación ordinaria no sentido contrario (no carril de subida). Ademais, desde as 22h do martes 16, non se permitirá o estacionamento no treito de Xosé Malvar comprendido entre a rúa Prado Novo e a rúa da Seca.
O venres 19, está previsto a reposición do firme nun treito da rúa das Fragas (no tramo que corresponde fronte ao aparcadoio de borde de Valdecorvos). Nese treito non se permitirá o estacionamento desde última hora da tarde do xoves 18. O luns 22, actuarase na rúa Palamios polo que o estacionamento nese vial quedará restrinxido desde última hora do domingo 21.
En todas estas actuacións permitirase o acceso e saída dos garaxes das rúas en obras, e tanto as limitacións de trafico como os tramos en obras están sendo sinalizadas con varios días de ante-lación para coñecemento da veciñanza e colectivos usuarios.
Estas actuacións enmarcanse no contrato de mantemento de espazos públicos urbanos, que vén de ser prorrogado para a anualidade 2021 por un importe de 450.000 euros, co obxecto de acometer arranxos en tramos de rúas da cidade que presentan algún tipo de deterioro por causa do paso do tempo e do seu uso continuado, así como por incidencias meteorolóxicas ou doutro tipo.
