Dende que Culturgal abriu as súas portas, a sucesión de eventos non tivo parada e este sábado non foi para menos. Aínda que cunha afluencia menor a das edicións prepandemia (a subida do prezo das entradas e o feito de que sexa fin de mes con Black Friday incluído poden ser as causas), o público volveu responder ás propostas da Feira das Industrias Culturais.
Un dos eventos máis destacados da programación deste sábado foi a presentación do libro Chévere 1987-2022, trinta e cinco anos de axitación cultural. Isto non pode ser obra de galegos!, editado por Kalandraka. Trátase dunha obra que recolle a historia da agrupación teatral dende os seus comezos, na Compostela de 1987, ata os últimos acontecementos logo da pandemia, pasando pola etapa da Sala Nasa, o Nunca Máis ou o Premio Nacional de Teatro concedido polo Ministerio de Cultura no ano 2014.
O libro ten como bandeira a creación colectiva, a transgresión de xéneros e a conexión crítica coa realidade. "Isto non só quere ser unha lección de xestión cultural ou un traballo de memoria. Lígase tamén coa parte artística e a autoficción", sinalou o presentador do evento, Roberto Pascual, director da Mostra de Teatro de Ribadavia (MIT). Con el estaban Miguel de Lira, Patricia de Lorenzo e Xesús Ron.
Narrado en primeira persoa nun formato dialogado e profusamente ilustrado, esta obra achega o proceso de creación das producións máis significativas de Chévere, algunhas editadas xa por Kalandraka na Biblioteca de Teatro.
Tras a presentación inicial, Miguel de Lira procedeu a contar a historia do título: "Nós non estamos na loita armada, pero si escénica", dixo mentres explicaba que a frase icónica Isto non pode ser obra de galegos!, que fai referencia ao atentado terrorista que sufrira o expresidente Fraga na súa casa de Perbes e que fora dita pola prensa local naquel momento, tamén lla dixeran á compañía cando representaban o seu traballo fóra de Galicia.
Ademais das mensaxes de crítica, parodia e musicalidade que caracteriza á compañía, Xesús Ron vincula a agrupación coa "cultura popular". A ese rasgo chamáronlle Chévere Pop. "Nós quixemos levar o teatro á cultura popular, pero sen desprexuizala", subliñou.
Talentos
A xornada do sábado brillou tamén pola arte improvisada. Dende os stands ou en forma de mural, todos tiñan un pequeño oco para amosar creatividade. Por outra parte, doce actividades dirixidas a empresas e profesionais desenvolvéronse ao longo da xornada do sábado para aprender e debater cuestións que preocupan ás industrias culturais.
O público infantil e familiar foi protagonista nos diferentes obradoiros que a feira propuxo arredor dos videoxogos, da pintura, da tipografía e da papiroflexia. A ciencia tampouco quedou atrás e Ciencia á Feira co CSIC Galicia trouxo, como cada ano, a Campaña de recolla de dentes do Rato Pérez liderada polo Centro Nacional de Investigación sobre a Evolución Humana. A cativada tamén puido gozar da película de animación Valentina e dos contos de Paula Carballeira.
O Broche final da xornada veu da man da música: Antía Muíño, Néboa, Berto e Grande Amore pecharon a gran noite do Culturgal amosando os novos talentos galegos do panorama musical.