Como "xoia" ou "regalo" cualificaron onte os membros do Consello Asesor do Museo de Pontevedra ao Convento de Santa Clara, espazo que mercou recentemente o Concello e que se agarda incorporar á institución museística nun futuro.
A arquitecta Teresa Táboas, o crítico de arte Ramón Rozas e a directora da Escola de Deseño e Moda (Esdemga), Lola Dopico, participaron nun percorrido de arredor de tres horas no que estiveron acompañados polo vicepresidente da Deputación, César Mosquera; polo concelleiro de Patrimonio, Xaquín Moreda, e pola directora de xestión económica do Museo, Sonia Mateos, entre outros.
Lola Dopico, director de Esdemga: "Recuperar este espazo conecta unha historia de séculos co presente e co futuro. É un gran regalo"
Tamén participou na visita o director do Museo, Xosé Manuel Rey, que aproveitou para informar de que se segue afondando no coñecemento do espazo. "Este é un momento de análise e reflexión para intenta definir o que se pode facer nestas instalacións", dixo.
"Na semana que vén vaise comezar co estudo de avaliación arqueolóxica, co estudo histórico-artístico e co estudo de lectura estratigráfica das paredes que permitirá identificar as fases construtivas, xa que o edificio ten engadidos que é preciso ir descubrindo. Aquí traballará un equipo interdisciplinar moi amplo, de non menos de 20 persoas. A idea é que este estudo nos permita saber o que foi Santa Clara e que o pode ser nun futuro". Segundo Rey, o obxectivo é que estes estudos preliminares rematen en tres meses.
Para a arquitecta Teresa Táboas, a incorporación de Santa Clara ao patrimonio público da cidade encaixa perfectamente no modelo urbano de Pontevedra. "Isto é unha xoia para a cidade. Dígoo xa non só como arquitecta senón tamén como cidadá. É un luxo que o Concello e a Deputación fagan deste espazo un lugar aberto á cidadanía".
Iso si, Táboas recoñeceu que a transformación de Santa Clara supón un reto. "O reto é facer un edificio que dea respostas ás necesidades do século XXI e de todo o tempo que vén por diante, á vez que dá resposta tamén ás necesidades da cidade de Pontevedra".
Teresa Táboas, arquitecta: "Aquí hai un reto importante: face un edificio que dea respostas ás necesidades do século XXI!
Para a arquitecta, a rehabilitación de Santa Clara encaixa nas novas fórmulas urbanísticas que apostan por reformar e recuperar antes que por construír. "Traballar na famosa clave de "re": recuperar e rehabilitar. Vivimos nunha zona onde xa hai moito construído como é Europa e temos que enfrontar problemas moi importantes como o do cambio climático, polo tanto, hai que enfrontar o futuro tendo en conta estas cuestións. Esta operación vai nesa liña de retomar aquilo que nos legou o pasado para deixalo nas mans da xente do futuro".
Abraio. Outro membro do Consello Asesor como é o crítico de arte Ramón Rozas referiuse ao impacto que tivera para el entrar por primeira vez no convento. "A miña primeira impresión é dun abraio total, tanto polo que hai como polo que pode haber nun futuro. Percorrer este espazo que estivo pechado durante sete séculos transmite unha atmosfera moi especial e moi singular", dixo ao tempo que destacou as posibilidades que lle ofrecía ao Museo a incorporación do convento.
"Hai que pensar no que se pode chegar a facer nun espazo coma este, o que pode significar para o Museo en canto a amosar fondos que agora mesmo non teñen posibilidade de ser expostos ao público. Os próximos meses e anos vannos marcar un novo camiño tanto para a cidade como para o propio Museo".
Ramón Rozas, crítico de arte: "os vindeiros meses marcarán un novo camiño tanto para a cidade como para o Museo"
Finalmente, tamén comentou as súas impresións a directora de Esdemga, Lola Dopico. "Á parte do que vai supoñer engadir este espazo á cidade e ao Museo, creo que vai supoñer moitas outras cousas a nivel de dinamización social e de relación dos cidadáns co propio espazo. Debe ser un espazo de exhibición, pero tamén de formación e de memoria da cidade»", comentou a mestra da Universidade de Vigo.
"Conéctase a historia de séculos co presente e co futuro da cidade. E conectános tamén co momento que vive a cidade e con esa idea de recuperar espazos, de non desbotalos. É un gran regalo, un regalo enorme".