Trala boa acollida que esta actividade tivo o ano pasado, a programación organizada pola Concellería de Igualdade e o Centro de Información á Muller (CIM) para conmemorar o 8-M, chega aos CEIP de Pontevedra da man de Raquel Queizás cos contacontos Na túa man. Contos para a Igualdade. Os talleres deron comezo o luns coa participación dos alumnos de 1º e 2º de Primaria do CEIP de Marcón e dos de Infantil da EEI de Verducido.
As sesións de contacontos, explica a edil Yoya Blanco, proseguirán nos CEIP Parada de Campañó e San Martiño de Salcedo. En abril haberá obradoiros nos CEIP A Carballeira, Cabanas, Xunqueira I e Xunqueira II. "Quedan outros catro colexios máis que os celebrarán en maio", engade.
Á marxe destes contacontos destinados aos máis pequenos, a Concellería de Igualdade ten en marcha outra iniciativa orientada ao alumnado de 3º e 4º da ESO. Trátase dun Concurso de Tik Tok pola Igualdade organizado coa finalidade de visibilizar, previr e denunciar a violencia de xénero, impulsando a reflexión e a conciencia crítica do alumnado, ao mesmo tempo que desenvolven a súa creatividade. O prazo para presentar vídeos estará aberto ata finais de abril.
