viernes. 15.01.2021 |
El tiempo
viernes. 15.01.2021
El tiempo

O covid-19 sacrifica as festas do Entroido pontevedrés, pero salvará a Ravachol

Ravachol virá este ano pero previsiblemente sen actos para evitar as aglomeracións de xente. RAFA FARIÑA (ADP)
Ravachol virá este ano pero previsiblemente sen actos para evitar as aglomeracións de xente. RAFA FARIÑA (ADP)
Non se celebrará ningunha das actividades destas festas, nin o desfile, nin a Mostra da Parodia, nin a Noite Pirata, nin o Certame de Murgas ▶ O papagaio máis famoso da Boa Vila estará presente, pero sálvase de ser queimado para evitar aglomeracións durante o velorio

A pandemia de covid-19 non permitirá celebrar este ano a programación habitual do Entroido pontevedrés. Non haberá desfile, nin concurso de murgas, nin Noite Pirata, nin Mostra da Parodia por primeira vez en décadas. Si chegará Ravachol, aínda que o fará sen presentación para evitar aglomeracións. "É o protagonista máis importante do Entroido e merece ter un trato diferente", explica Carme da Silva.

Do mesmo xeito, o papagaio non será incinerado, salvado polo covid, tamén coa finalidade de que o seu velorio non xere unha afluencia de público que poida ser foco de contaxio. "Hai que agradecer o esforzo da Asociación Recreativa de Xeve, que se encarga da confección de Ravachol, respectando todas as medidas de seguridade e sen ese traballo colectivo que é habitual nestas festas", explicou a concelleira.

"Ravachol é o protagonista máis importante das festas e merece un trato diferente"

Precisamente un dos motivos polos que se suspenden a totalidade dos actos propios do Entroido pontevedrés é a imposibilidade de realizar reunións para os ensaios de comparsas e outras agrupacións que participan nestas festas. Nin están permitidas nin serían seguras. Ademais, Carme da Silva recordou que eventos como o desfile de Carnaval, que ateiga as rúas da cidade por un tempo que adoita superar as cinco horas.

O Entroido da cidade queda así practicamente cancelado, aínda que se manterán certas actividades testimoniais nas prazas de cara a "recordar e homenaxear ás persoas que traballan todos os anos para que a poboación goce destas festas", explicou a concelleira de Festas, Carme da Silva, nunha rolda de prensa na mañá de onte.

"Este será un Entroido distinto e triste no que recordaremos o que esta situación tan dura non nos permite facer"

As festas deste ano terán como fío condutor a memoria histórica do carnaval na rúa. Carme da Silva recoñeceu que o deste 2021 será un entroido "diferente e triste no que recordaremos o que esta situación tan dura non nos permite facer". Deste xeito, o Concello prepara diversas mostras para ocupar o espazo público nas que recordar outros entroidos, así como os anos de arraigo desta festa na cidade.

Da Silva indicou que nos vindeiros días dará a coñecer distintas actividades que promocionará o departamento que dirixe sobre o Carnaval. Serán propostas que tratarán de recuperar a memoria histórica do Entroido na cidade, e que non suporán a congregación de persoas.

"Hai que agradecer o esforzo da Asociación Recreativa de Xeve, que confecciona a Ravachol"

Estas exposicións e similares tamén servirán para facer unha homenaxe a todas as persoas que ano tras ano participan no entroido pontevedrés.

A deste ano sería a trixésima edición do Certame de Murgas, que cumpriría 30 anos desde a súa posta en marcha de celebrarse o Entroido con normalidade. O evento reúne cada vez máis cantidade de agrupacións que amosan a súa visión máis cómica e satírica da actualidade con récord de público, con colas dende primeira hora da tarde ata a hora do comezo do espectáculo no Pazo da Cultura para conseguir unha butaca libre. O covid trasladará este aniversario especial a 2022. Queda cancelada tamén a que sería a XXV Mostra da Parodia do Entroido. Así, o evento tería tamén motivos para a celebración tras 25 anos en marcha. O cuarto de século terá que pospoñerse, do mesmo xeito, ao próximo Carnaval, obrigado pola pandemia de covid-19, ao igual que a Noite Pirata, que se celebrará no martes de Entroido de 2022.

Pontevedra renuncia así ao seu Entroido, que tería que encher as rúas entre os sábados 13 e 20 de febreiro, por preservar a saúde pública na medida do posible na terceira vaga da pandemia.

O covid-19 sacrifica as festas do Entroido pontevedrés, pero...
Comentarios