jueves. 12.12.2019 |
El tiempo
jueves. 12.12.2019
El tiempo

Culturgal clausúrase superando as 14.000 visitas e emprazando á edición de 2020

A Feira das Industrias Culturais de Galicia pon en Pontevedra o punto final á súa XII edición cunha xornada na que participaron Oliver Laxe, Quico Cadaval, Arantza Portabales, María Fumaça e Pedro Feijoo

Algo máis de 14.000 persoas pasaron pola XII Feira das Industrias Culturais de Galicia, Culturgal, que se celebrou ao longo de toda a fin de semana en Pontevedra. Atendendo aos datos facilitados pola organización, o público xeral baixou lixeiramente con respecto ao ano pasado, cando superou as 14.500 persoas, pero mantense nas cifras que a feira baralla dende o seu inicio, mesmo nos anos nos que non cobraba entrada (entre 14.000 e 15.000 persoas). Como é habitual, moitas das propostas estiveron ateigadas de público. Un exemplo: os concertos de Dios Ke Te Crew ("con 250 persoas agardando o seu showcase desde unha hora antes do inicio"), das Tanxugueiras (ambos, o sábado) de Maria Fumaça (domingo), e mesmo o espectáculo central da feira, o concerto de despedida dos escenarios de Marful (tamén o sábado), que encheu o auditorio do Pazo da Cultura e "que foi transmitida en streaming pola Radio Galega, con 5.000 persoas seguíndoo pola rede", explicou o Culturgal.

A organización da feira, que emprazou á celebración do ano que vén, entre o 27 e o 29 de novembro, de novo en Pontevedra, tamén destaca o éxito doutras propostas da programación, como a sinatura de libros de diferentes autores. Este domingo mesmo foi o caso de Pedro Feijoo. E o sábado, o de Miguelanxo Prado. "Que un autor de banda deseñada internacional como é Miguelanxo Prado non só veña á feira a presentar a súa última obra, senón que pase asinando horas o seu traballo é un exemplo desa experiencia Culturgal que queremos que o público leve consigo", explica o director do evento, Xosé Aldea, en palabras facilitadas pola feira.

Cantos na Maré avanzou o que será a celebración do festival do ano que vén e o Concello presentou o cartel do Salón do Libro Infantil

A terceira xornada da Culturgal estivo marcada, entre outras cousas, pola proxección da última película de Oliver Laxe, O que arde; a performance que o dramaturgo Quico Cadaval realizou no Espazo para Arte Contemporánea, e a presenza de autores como Arantza Portabales. Esta última avanzou, entre outras cousas, que estaba escribindo a segunda parte da súa última novela, Beleza vermella, e lembrou que a adaptación ao teatro de Deixe a súa mensaxe despois do sinal se poderá ver en Santiago o 18 de abril.

Acto central da clausura da feira foi tamén a entrega do Premio do Público do Culturgal, que se escolle a través dunha votación on-line e que este ano recaeu no Festival dos Eidos, que se celebra no Courel (Lugo).

A maiores, Pontevedra tivo o seu protagonismo na xornada do domingo. Por unha banda, o Concello avanzou o que será a celebración do Salón do Libro Infantil e Xuvenil da cidade coa presentación do seu cartel. Por outra, os responsables de Cantos na Maré falaron da consolidación do novo formato do festival da lusofonía.

Culturgal clausúrase superando as 14.000 visitas e emprazando á...
Comentarios