Compromiso por Galicia aposta por entroncar na identidade de Pontevedra as claves "para un futuro económico próspero" coa creación dun clúster empresarial das artes e do deseño.
O partido reivindica o pasado e aposta pola creatividade como uns dos principais valores da cidade. Desde a historia dos grandes canteiros pasando polas pensións da arte da Deputación ata a Bienal ou a Facultade de Belas artes, Publicidade e Comunicación Audiovisual, a Escola de Moda, a Escola de Canteiros ou a Escola de Forestais ou Restauración. "Cremos que Pontevedra pode ter na arte, a creatividade e o deseño un dos seus principais motores económicos e empresariais. Apostamos por que a creación artística e o deseño, en todas a as súas especialidades, sexan capaces de artellar un modelo económico hoxe inexistente pola pasividade e desidia do Goberno municipal e doutras administracións", afirmou o candidato de CxG á Alcaldía de Pontevedra, Andrés Núñez Rajoy, "un modelo que xunte a economía de servizos da creatividade cunha economía da arte, da moda, o moble e madeira e a publicidade..., que nos permita deixar de ser permanentemente unha das cidades con máis altos niveis de desemprego de Galicia".
Segundo engadiu, o clúster sería "unha busca da mellora da competitividade e da multiplicación de novos proxectos empresariais na cidade" e tería a súa sede no antigo edificio de Hacienda.
Neste novo centro incluiríanse obradoiros e postos para traballar, ademáis de puntos de axuda ao emprendemento e asesoramento xurídico e fiscal. A proposta considera que a adhesión das administracións e a universidade "sería positiva, agrupando e atraendo a Pontevedra diferentes empresas, facilitando os espazos para a súa implantación e orientando a súa cooperación conxunta", dixo.