Os veciños do barrio da Pasarela desfrutaron este xoves da súa propia festa de Entroido cunha degustación de filloas e música en directo. Trátase da primeira celebración destas características que se fai nesta zona da cidade, situada entre as rúas 12 de novembro e Xosé Adrio Barreiro co gallo de levar o Entroido e facer partícipe da festa a tódolos barrios da cidade.
Bautizada como os Xoves da Pasarela, os pontevedreses das rúas que rodean a vía do tren viviron unha xornada de troula e diversión con música en directo. A veciñanza da zona colaborou na realización desta festa que contou coa implicación de máis de 60 locais do barrio e unha degustación de filloas en cinco establecementos de hostalería. De feito, a Pasarela é unha zona urbana cuxo parque reúne habitualmente a un gran número de cativos.
Ademais do Entroido da Pasarela, os veciños do barrio do Burgo tamén desfrutarán dunha festa de disfraces este sábado a partir das 22.30 horas no Centro Cultural do Barrio.
Xunto coa celebración do Entroido da Pasarela e O Burgo a cita deste venres céntrase nas diferentes prazas da cidade coa Mostra da Parodia. Esta cita e xa unha habitual do Entroido pontevedrés no que centos de persoas enchen as rúas para ver as retranqueiras representacións que fan grupos da cidade e da comarca a partir das 22.30 horas.
Nesta XXVI edición participan os agrupacións Os do Val do Lérez, que actuará na Praza do Concello; Vamos a Todo, nos Soportais da Ferraría; As sonecas van de festa, que actuarán na Praza da Peregrina; Os das Pistas, en Casa Alcalde; Equipo Ja, na Praza de Ourense; Parodia PTV, en Manuel Quiroga e Las Flores del Carnaval, que fará o propio na Praza da Ferrería. A partir da 1.00 horas terá lugar a entrega de premios.