martes. 12.11.2019 |
El tiempo
martes. 12.11.2019
El tiempo

Degustación gourmet de Pontevedra

Un momento da proba de produtos ofrecida na pasada edición da feira. GONZALO GARCÍA
Un momento da proba de produtos ofrecida na pasada edición da feira. GONZALO GARCÍA
Nesta edición de Etiqueta Negra, que se celebra esta fin de semana no Recinto Feiral, os alumnos do CIFP Carlos Oroza realizarán un percorrido virtual e gastronómico por prazas da cidade para lembrar nas súas propostas culinarias aos antigos protagonistas das mesmas, como os grelos na da Verdura ou o pan na do Teucro

Dende a primeira edición de Etiqueta Negra o Centro Integrado de Formación Profesional (CIFP) Carlos Oroza colabora activamente coa a feira do gourmet galego Etiqueta Negra e este ano non podía ser doutro xeito. O centro formativo volverá ter un stand propio e, ademais, o alumnado de 2º de Cociña A, 1º e 2º de Servizos en restauración, 2º de Panadería e 2º de Guía –baixo a dirección dos profesores Paco Moreno, Carlos Rodríguez, Manuel Patiño, Eva Lage e Tina Otero– desenvolverá un particular ‘Paseo Gastronómico pola Pontevedra do CIFP Carlos Oroza’.

Trátase dun espectáculo de cociña en directo, que terá lugar no Anfiteatro Estrella Galicia o luns 11 ás 11.30 horas, con degustación para 100 persoas e que inclúe un percorrido virtual por varios lugares da cidade relacionados coas propostas gastronómicas e coa oferta formativa do centro.

IMPLICACIÓN. Un dos responsables da organización desta actividade, Paco Moreno, explica que a idea xurdiu porque "habitualmente se realizan actividades cos ciclos de cociña e servizos, pero no centro temos outros relacionados tamén co turismo, o que quixemos con esto é realizar unha actividade conxunta na que se inclúa a toda a oferta formativa, na que se involucre a todo o centro".

Deste xeito, a praza da Verdura, que o Carlos Oroza asocia ao Ciclo de Guía, información e asistencia turística, será a primeira parada. O menú a degustar terá moito que ver coa actividade que antigamente se celebraba nela: a venda de verduras e hortalizas. Os alumnos ofrecerán unha bebida saudable vexetal feita con produtos da horta do centro.

A seguinte paraxe será a praza do Teucro, asociada ao ciclo de Panadaría, repostería e confeitaría. Neste caso, a oferta ten que ver co pan ofrecendo un aperitivo de pan de masa nai recheo de tomate confeitado.

O paseo virtual proseguirá na praza de Mugartegui (relacionada co ciclo de Servizos de Restauración) e no Mercado (ciclo de Cociña). Os asistentes degustarán un cóctel con uva sen alcohol e unha tosta de sardiña lañada. Nesta actividade colabora o Museo da Salgadura de O Grove, que é o que ofrece a sardiña salgada de xeito tradicional.

Finalmente, o Parador (ciclo de Xestión de aloxamentos turísticos) será a última parada. Pensando nas camelias que o rodean e no frío do outono o resultado será a degustación dun chocolate quente con galleta de camelia.

"Convidamos á xente asistir porque será unha actividade moi interesante. As visitas van estar dirixidas polos alumnos do ciclo de Guía e os platos serán presentados polos alumnos que os elaboraron", explica Moreno.

HORARIOS. A cuarta edición da feira do gourmet galego Etiqueta Negra, que se celebrará esta fin de semana e o luns no Recinto Feiral, permanecerá aberta, en horario ininterrompido, de 11.00 a 21.00 horas agás o luns, que pechará ás 20.00 horas. A entrada custa 3 euros por día pero tamén se pode mercar un abono para os tres días ao prezo de 8 euros.

Este evento está impulsado pola concellaría de Promoción Económica do Concello de Pontevedra, que dirixe a socialista Yoya Blanco, e conta por primeira vez co apoio de Estrella Galicia como patrocinador principal.

Participan tamén Cabreiroá, como auga oficial, Deputación de Pontevedra, Eroski, Mel de Galicia e a Mancomunidade do Salnés, Tawi, Gadis, CIFP Carlos Oroza, Gráficas Anduriña, Froiz e Kitchen In.

Degustación gourmet de Pontevedra
Comentarios