A Xunta de Goberno Local aprobou unha nova prórroga de catro meses do contrato de desinfección e limpeza diarias dos 62 parques infantís da Boa Vila. Así, a Concellería de Desenvolvemento Sostible e Medio Natural achegará 153.481,87 euros, o que implica un investimento de 1.258 euros ao día para dar cumprimento ás medidas esixidas pola Xunta dende o pasado verán.
O edil socialista Iván Puentes informou de que, a maiores, están a tramitar a contratación ordinaria do servizo pola vía dun acordo marco, para que este se manteña unha vez transcorrida a prórroga.
Deste xeito, a limpeza e desinfección dos espazos de recreo corre a cargo de catro brigadas integradas por dúas persoas, que entre as 00.00 horas e as 7.00 horas traballan para garantir unhas adecuadas condicións hixiénico-sanitarias. Con todo, Puentes quéixase de que a Xunta non "asuma nin un peso deste gasto extra”, que supón un grande desembolso monetario para o Concello.