Pontevedra
El espíritu del Samaín vuelve a invadir Briz
Pontevedra potenciou este ano a celebración do Samaín, a tradición galega vinculada ao Día dos Defuntos, ampliando os habituais obradoiros de decoración de cabazas, que se viñan facendo na denominada Noite dos Calacús, cunha programación que incluíu este martes contadas terroríficas para a cativada e para persoas adultas, música en directo e distintos espectáculos de rúa. O Concello e a asociación Zona Monumental estaban detrás destas propostas, que se tiveron que concentrar en boa medida nunha carpa instalada na Praza de Curros Enríquez debido ao mal tempo.
A festa comezou pola tarde coas actividades para as crianzas, que incluían obradoiros de calacús e maquillaxe, contadas a cargo de Bea Campos e un concerto da Gramola Gominola.
A partir das nove da noite tiveron lugar as propostas dirixidas ao público adulto. Abríronas as historias de medo que contaron a mencionada Bea Campos e dous dos máis importantes narradores orais galegos: Celso Fernández Sanmartín e Quico Cadaval.
Tras eles chegou a vez dos espectáculos de rúa. Dous deles adiantaron a súa saída debido ás previsións meteorolóxicas. Foron as de Pablo Méndez Performances, que levaba por título O día dos mortos, e a de Hípica Celta, que se titulaba Dragóns.
Ambos percorreron distintos espazos do centro histórico, como tamén estaba previsto que fixera Troula, coa súa proposta, SubUmbra, xa a última hora da noite, salvo cancelación no último momento debido ao tempo.
