Así mesmo, destacan dous catedráticos do campus de Pontevedra. Trátase de Adolfo Cordero, profesor da Escola de Enxeñería Forestal, que se atopa entre os 400 investigadores máis referenciados en Entomoloxía, e de Carlos Lago, docente en Ciencias do Deporte, que forma parte dos 250 científicos do mundo máis citados no seu eido e que, ademais, en 2020 volveu ser o investigador español máis citado.
Elaborada por John P. A. Ioannidis, da Stanford University, xunto con Kevin W. Boyack, de SciTech Strategies, e Jeroen Bass, de Elsevier, esta base de datos ten como obxectivo proporcionar "información estandarizada" sobre o número de citas, a partires dun indicador creado para este proxecto e co que establecen dúas clasificacións de investigadores e investigadoras, tendo en conta ou non as autocitas a traballos previos. A súa última actualización, publicada recentemente por Plos Biology, sitúa 29 investigadores e investigadoras da UVigo entre os máis citados do mundo ao longo da súa traxectoria e un total de 36 no que referido á produción científica no ano 2020.
A MAIORÍA, DE VIGO. A maioría deles pertencen a centros de investigación do campus de Vigo. Con 158 publicacións, ás que se fixo referencia en 64.416 artigos entre 1996 e 2020, o investigador do Cinbio David Posada encabeza a representación da UVigo nesta listaxe, sendo o décimo investigador do mundo e o primeiro de España no campo da Bioloxía Evolutiva, no que o investigador do CIM-UVigo (Centro de Investigación Mariña) Armando Caballero é o cuarto autor español máis citado e o 456 do mundo.
Tras ser seleccionado no programa de captación de talento HCR da UVigo 2020, o investigador chinés Jianbo Xiao convértese no segundo investigador máis destacado da institución neste ránking, situándose no posto 113 no campo de Ciencia dos Alimentos, ámbito no que o catedrático Jesús Simal Gándara ocupa o posto 232 do mundo e Herminia Domínguez o 373. A investigadora do Cinbio Isabel Pastoriza volve ser, por outra banda, a científica máis destacada da UVigo neste ránking, situándose entre as 900 máis citadas no ámbito da Nanociencia e Nanotecnoloxía, no que tamén figura Jorge Pérez Juste.
O investigador do Cinbio Juan Carlos Parajo ocupa o posto 138 no apartado de Biotecnoloxía.