domingo. 25.10.2020 |
El tiempo
domingo. 25.10.2020
El tiempo

Os emprendementos sostibles triunfan na edición máis valente

Mesa redonda sobre tendencias e innovacións nos escenarios, celebrada este mércores na Facultade de Belas Artes como actividade previa aos días principais. RAFA FARIÑA
Mesa redonda sobre tendencias e innovacións nos escenarios, celebrada este mércores na Facultade de Belas Artes como actividade previa aos días principais. RAFA FARIÑA
O Pont-Up Store encherá este venres e o sábado a Praza de España con máis de 60 actividades e 46 novas iniciativas empresarias ▶Ideas de negocio, workshops, charlas, laboratorios creativos e demostracións completan un evento promovido polo Campus CREA

Zapatillas veganas, scooters de tres rodas, unha cooperativa de porcos celtas, roupa que conta contos... A imaxinación, xunto coa valentía e unha pinga de sorte están detrás dos emprendementos que se visibilizarán o venres e o sábado na praza de España de Pontevedra grazas ao Encontro de Emprendemento Pont-Up Store, que cumpre a súa sexta edición co lema O impulso da xente valente e que ten a sostibilidade e o compromiso social como eixes centrais de boa parte das propostas.

O mércores xa comezou a funcionar o Laboratorio Creativo instalado na Sala X da Facultade de Belas Artes coa mesa redonda Tendencias e innovacións nos escenarios, pero será este xoves cando arrinque o intensa programa previsto de aquí ao sábado. Serán tres intensos días de actividades, ideas de negocio, obradoiros, workshops, charlas inspiradoras e presentaciónns de novas iniciativas empresariais, que supoñen a programación "máis ambiciosa" deste encontro ata o momento, segundo destaca a organización. O Pont-Up está dirixido polo grupo de investigación G4 Plus do campus de Pontevedra baixo o paraugas do Campus CREA da Universidade de Vigo.

Este xoves continúa a actividade deste laboratorio, pero será sobre todo unha xornada protagonizada pola Economía Social e Creativa, con entrada libre ata completar aforo. Durante toda a mañá na Sede Afundación tratáronse os retos que se lles plantexan ás cooperativas do sector cultural a través de varias mesas de experiencias inspiradoras.

Dentro do Espazo Gaming, a Casa das Campás acollerá ás 18.30 horas unha charla técnica arredor da creación de personaxes nos videoxogos. Estará impartida por Alberto Abal, deseñador de Corvus Belli, a empresa galega creadora de Infinity, un wargame de éxito mundial. Abal contará como abordan a creación de pesonaxes para os seus xogos, falándonos da caracterización do público obxectivo, os puntos de partida creativo ou os límites propios.

O Pont-Up Store volverá ter o seu epicentro na carpa situada na praza de España o venres e o sábado, onde será posible coñecer ás persoas valentes que se atreven a emprender e ás que este ano homenaxea o slogan. Poderase comprobar como latexan os 46 emprendementos seleccionados polo seu alto potencial de desenvolvemento entre 168 candidaturas procedentes de toda Galicia, o que supón un incremento do 17% con respecto á anterior edición.

Destas 46 empresas seleccionadas, 34 contarán cun stand gratuíto para mostrar os seus productos, ideas e servizos, e 14 terán tamén a oportunidade de participar no programa de actividades demostrativas, con propostas tan interesantes como demostracións de marketing olfativo, probas con vehículos eléctricos, sesións de formación científico-tecnolóxica para a rapazada, un taller de maxia, un obradoiro de panadería artesá e unha proposta práctica sobre como conseguir a difícil e sen embargo posible tarefa de reducir o noso consumo de residuos plásticos.

SOLUCIÓNS ECOLÓXICAS. Nesta sexta edición destaca a cantidade de empresas de nova creación que plantexan solucións para reducir a pegada ecolóxica desde múltiples ambitos; e tamén as iniciativas para activar o rural galego. De feito, subliña a organización, case a metade das seleccionadas teñen a sostibilidade como liña central do seu negocio.

Entre elas destacan Huella Menguante, unha tenda online de produtos de uso diario orientados a reducir os residuos plásticos, que son reutilizables, biodegradables e de cercanía; Beflamboyant, fabricante de zapatillas veganas; EEzon E3, que propoñen scooters eléctricos de tres rodas para moverse pola cidade, ou D- Raíz, unha marca de complementos de moda sostible manufacturados en Galicia.

Tamén paticiparán Estudio Avelaíña e Cetácea Studio, que fan deseño creativo sostible co obxectivo de "salvar o mundo"; A Factoría Atelier, que se dedica a recuperar mobles e facer creacións artesanais de decoración e complementos a partir de materiais recuperados e sustentables; Meraki Ferments, os primeiros en elaborar Kombucha en Galicia, e Somos Terra, que ofrecen formación en sostibilidade e asesoramento en desenvolvemento sostible.

Farrapos e contos é un movemento ecolóxico, sostible, solidario e consciente creado a partir dunha marca de roupa conta contos; a cooperativa Catro Ventos é unha editora enfocada a publicacións de ecoloxía, consumo sustentable e economía social; Toxo Aventura e Rooteiro ofrecen interesantes propostas de turismo sostible e a cooperativa Triquels axuda a empresas e marcas con valores a mellorar a súa comunicación e sustentabilidade.

Aínda dentro da sustentabilidade, subliña a organización, é "esperanzadora" a cantidade de negocios lanzados desde o rural ou co obxectivo de actívalo. É o caso de MycoGalicia Plantae, que se centra na xestión e valorización do recurso micolóxico dos montes galegos para o desenvolvemento rural; Tres Fuciños, unha cooperativa de porcos celtas criados en liberdade nos montes de castaños e carballos; e Galician Rural Lab, que propón unha plataforma de empoderamento das parroquias do rural galego a través do método da fotografía e o vídeo participativo. Tamén chega do rural A3 Proyectos, dedicada á representación virtual de proxectos de Enxeñaría e Arquitectura.

Outras propostas con base teconolóxica son Kidcode, pero neste caso cun proxecto de formación científico-tecnolóxica para rapaces, enfocado a axudarlos a identificar os seus talentos e habilidades a través da tecnoloxía; TICgal, que dá soporte a unha aplicación opensource chamada GLPI; Nososono, un espazo online onde artistas, deseñadores emerxentes e artesáns expoñen, difunden e venden os seus produtos pensados e fabricados a man; Mundo Escénico, unha plataforma dixital creada co obxectivo de modernizar, democratizar e facer máis accesible o mundo das Artes Escénicas en Galicia, e Koompany Growth Partner, unha consultora de crecemento, negocio dixital e marketing online. Tamén participarán Revista Morcego, publicación dixital centrada exclusivamente en información sobre videoxogos en galego, e Siente VR, unha productora de contidos inmersivos a través de fotografía e vídeo en 360 graos.

A HORA DOS SÉNIOR. Nesta edición o encontro dedicará tamén un espazo a emprendementos liderados por persoas que xa cumpriron co seu ciclo laboral pero queren permanecer activos. Entre outras iniciativas presentarase o proxecto Vulnerables liderado por Xaime Fandiño e destinado a fomentar o envellecemento activo e interxeracional, dando visibilidade ao coñecemento senior a través de actividades lúdicas, artísticas e empresariais nas que colaboran persoas de diferentes idades e xeracións: desde os 20 ata os 70 anos.

A iniciativa conta co respaldo da Universidade de Santiago de Compostela, e ten como mentor a Daniel Jiménez, fundador da plataforma de viaxes e experiencias Waynabox.

Os emprendementos sostibles triunfan na edición máis valente
Comentarios