Ence obtivo un beneficio neto de nove millóns de euros en 2019, un 93% menos

A compañía destaca que os resultados estiveron marcados pola caída do prezo da celulosa e polos "importantes investimentos" acometidos
La fábrica de Ence en Pontevedra. RAFA FARIÑA
photo_camera La fábrica de Ence. RAFA FARIÑA

Ence Energía y Celulosa logrou un beneficio neto de 9 millóns de euros no exercicio 2019 (-93%) e un Ebitda de 127 millóns de euros  (-56%). O Ebitda do negocio de Celulosa foi de 75 millóns de euros (-69%), mentres que o de Enerxía Renovable foi de 52 millóns (+15%).

Os resultados estiveron marcados pola caída do prezo da celulosa e pola execución "de importantes investimentos previstos" no Plan Estratéxico para ampliar capacidade en Celulosa e en Enerxía Renovable, indica a compañía nun comunicado.

Durante o cuarto trimestre implementouse "con éxito" a ampliación de capacidade de 80.000 toneladas prevista na biofábrica de Navia e que supuxo a mellora de practicamente todos os procesos industriais da planta. Ademais executáronse investimentos na biofábrica de Pontevedra "para mellorar a súa eficiencia e calidade ambiental".

A compañía destaca que o prezo da celulosa "comezou a dar síntomas de recuperación", tras estar nuns niveis mínimos dos últimos 10 anos no cuarto trimestre de 2019, e o ritmo de produción das biofábricas de Ence no que vai de ano supera "claramente" ao do mesmo período do ano anterior.

En Enerxía Renovable, están a incorporarse no primeiro trimestre dúas novas plantas de biomasa cunha capacidade de 96 MW, que están a contribuír a aumentar en máis dun 50% a xeración renovable en 2020.

Ademais, Ence conta cunha carteira de proxectos de 405 MW con acceso á rede e localizacións aseguradas de solar fotovoltaica, biomasa e hibridación termosolar-biomasa

Comentarios