Ence continúa implantando medidas que garantan a saúde de todo o seu equipo humano na crise sanitaria. A compañía comunicou onte a adquisición de lentes especiais anti-vaho, de novos equipos de comunicación interpersoal para evitar situacións de risco, e a obrigatoriedade de portar máscara de tipo FFP2 para acceder ás súas instalacións como algunhas das últimas medidas que está a aplicar.
Desde febreiro de 2020, a factoría destinou 7,6 millóns de euros a gastos e 1,3 millóns a investimentos relacionados directamente coa covid-19. Así, entre os gastos atópase a adquisición e aplicación de test de detección do virus (ata 2.600 test á semana), máscaras, elementos de protección individual, ou xeles, entre outros. Tamén se inclúen as limpezas especiais realizadas nos centros de traballo, e o reforzo do persoal para facer fronte ás situacións xeradas pola pandemia.
No capítulo de investimentos, destaca a adecuación dos sistemas de ventilación de todos os centros e oficinas da compañía, para garantir a seguridade dos espazos de traballo, así como a instalación de todo tipo de mobiliario, como biombos e pantallas. Tamén se inclúe a dixitalización dos procesos, para evitar desta maneira o contacto interpersoal, e a implantación do teletraballo, que permitiu garantir a continuidade da actividade da compañía minimizando o risco de contaxios.
Tamén destaca a implantación da ferramenta dixital Pasaporte covid. O equipo humano de Ence mantén unhas estritas medidas de seguridade para poder realizar o seu traballo sen risco de contaxio, como controis de temperatura á entrada das instalacións, desinfección etc. e mantén o teletraballo para aquelas persoas cuxo labor profesional o permite.
