Non pasaran nin dúas semanas de 1985 cando os veciños de Marcón ergueron barricadas nos accesos ao Monte Carrasco, a unha parcela cedida ao Concello para a construción dun novo colexio na parroquia e na que pretendían empezar os traballos para levantar un cuartel da Garda Civil. Despois de intensas mobilizacións, polémicas co alcalde da época –Rivas Fontán– e mesmo un mitin do secretario xeral do Partido Comunista, Santiago Carrillo, que elevou o debate ao Congreso, o pobo logrou o seu obxectivo.
En xaneiro de 1991 iniciáronse as obras do actual Ceip de Marcón, que entrou en funcionamento no curso 1991-1992 para acoller aos escolares desta parroquia e da de Tomeza.
Unha exposición lembra a historia do colexio, incluíndo a mobilización para evitar a construción dun cuartel da Garda Civil
A comunidade educativa celebrou este mércores o 25 aniversario e esta loita tivo o seu merecido protagonismo. "Grazas o esforzo dos veciños por conseguir que o colexio se construíra nesta parcela do Monte Carrasco", subliñou Juan Gestal, ex director do centro entre 2004 e 2013, na súa intervención, na que tamén lembrou o traballo dos seus antecesores e da súa sucesora, Carmen Lens ("o colexio non pode estar en mellores mans"). Da súa autoría é a exposición que repasa a historia do centro e que inclúe detalles da hemeroteca de Diario de Pontevedra. "A evolución do centro foi espectacular". De feito, recolle as melloras realizadas, como a dotación de comedor ("foi importante para aumentar a matrícula", que actualmente é de 181 alumnos), a nova biblioteca, o ximnasio ou o parque infantil.
A directora, Carmen Lens, subliñou que "ten que haber empatía e confianza entre as familias e o colexio", un feito que sí se dá en Marcón, como corroborou o secretario da Anpa, Óscar Coto, quen lle entregou como agasallo ao centro unha figura de Sargadelos Castelao. Tamén participou o alcalde, Fernández Lores, quen confía en que a súa neta, que nacerá nunhas semanas, sexa futura alumna do centro.
Os actos incluíron outra mostra, neste caso de fotografía que repasan a parte lúdica, como festivais de Nadal e Entroido, excursións ou magosto, e unha actuación dun grupo de música tradicional. Unhas 150 persoas participaron no xantar e xa pola tarde houbo xogos populares.
