O sexto seminario da Facultade Ágora da Deputación puxo este venres sobre a mesa a necesidade de mobilidades alternativas para desenvolver correctamente as cidades. As expertas e expertos foron claros: ''É preciso desbotar como solución os patinetes e os coches eléctricos, que só abordan o problema das fontes de enerxía e a contaminación, mais non contribúen a un cambio de modelo no que se potencie a saúde, nin a recuperación de espazos para as persoas, nin a seguranza viaria''.
Na xornada estiveron presentes o xeógrafo, matemático e técnico urbanista Alfonso Sanz, que traballou como consultor en máis de 30 cidades españolas; o arquitecto e experto José Carpio-Pinedo; a ex responsable da Oficina Metropolitana da Bicicleta en Barcelona e coordinadora da Rede de Cidades pola Bicicleta, que traballa para o Concello barcelonés nos proxectos de transformación urbanística, Silvia Casorrán; o arquitecto urbanista Martín Barreiro; e o coordinador de Contidos da Facultade Ágora, Fernando Nebot.
O deputado de Mobilidade e Espazo Público, Uxío Benítez, asegurou que nas cidades e vilas é preciso apostar por unha mobilidade activa, camiñar e andar en bicicleta, fronte aos vehículos motorizados e á electrificación. Criticou que os fondos Next Generation de reconstrución trala pandemia estean centrados na aposta polas zonas de baixas emisións e os coches eléctricos, en lugar de plantexar un cambio no modelo urbano que teña como prioridade a cohesión social.
Neste sentido, Alfonso Sanz criticou duramente patinetes e coches eléctricos como solución definitiva á mobilidade nas cidades e destacou que a Lei de Cambio climático afectará ás vilas de máis de 50.000 habitantes obrigando a crear zonas de baixas emisións, mais destacou que esta normativa inclúe o Plan Nacional Integrado da Enerxía e Clima (PENIEC) que realmente ten como obxectivo reducir un 35% os quilómetros percorridos. Subliñou que, no caso de vilas pequenas, o fundamental é seguir transformando o espazo público para facelo máis accesible, entendendo as travesías como parte da cidade onde hai circulación de vehículos pero estes deben entrar como invitados.
Pola súa banda, José Carpio tamén criticou as zonas de baixas emisións e a electrificación por facer referencia unicamente ao tema ambiental. Insistiu en que se está a roubar espazo á cidadanía e preguntou que acontecerá cando en 15 anos toda a frota de vehículos xa sexa eléctrica. ''Igual que hai carrís VAO debería haber zonas VAO, non utilizar o automóbil para unha soa persoa. Hai que ir cara a outro plantexamento, como garantir o dereito a chegar a un lugar, a un aparcamento disuasorio e despois optar por outras mobilidades'', finalizou.
En xeral, na xornada defendeuse que as solucións da mobilidade deben ser construídas por cada cidade ou vila, xa que cada unha ten un contexto distinto, e basicamente baixo as fórmulas de mellorar a mobilidade activa, con desprazamentos peonís e ciclistas, e deixar de forma moito menos abusiva e residual o uso dos vehículos privados.
