lunes. 16.09.2019 |
El tiempo
lunes. 16.09.2019
El tiempo

A Fieitiña celebra a arte de palillar

A directiva da asociación A Fieitiña xunto ao alcalde, Miguel Anxo Fernández Lores, e a edil de Cultura, Carmen Fouces. JAVIER CERVERA-MERCADILLO
A directiva da asociación A Fieitiña xunto ao alcalde, Miguel Anxo Fernández Lores, e a edil de Cultura, Carmen Fouces. JAVIER CERVERA-MERCADILLO

O Recinto Feiral acollerá entre o 17 e o 19 de maio o XIV Encontro de Palilleiras de Pontevedra, que prevé reunir a 1.300 persoas que expoñan os seus traballos e amosen a súa técnica

Unha técnica de artesanía, parte da cultura e do legado que pasa dunhas mulleres a outras, "unha escola de saberes que se transmite por vía materna". Así definía este martes a concelleira de Cultura, Carmen Fouces, a arte de palillar na presentación do XIV Encontro de Palilleiras de Pontevedra, que terá lugar entre o 17 e o 19 de maio no Recinto Feiral.

Tal e como explicou este martes o alcalde de Pontevedra, este é o encontro máis grande de Galicia e un dos maiores de todo o Estado, despois do de Barcelona. Deste xeito, prevese que participen ata 1.300 palilleiras chegadas de diferentes puntos da Península.

ℹ Máis información sobre o evento, na páxina web da asociación: www.afieitina.es

Desta vez, a cita conta con novidades como novos cursos ou unha mostra de homenaxe a Luís Seoane con 17 obras súas realizadas en bolillos por Ana Rosa Liste Sebe. As integrantes da asociación A Fieitiña levaron unha destas pezas á presentación que tivo lugar o martes no Concello. "O encaixe é unha actividade de futuro cunha compoñente económica importante que serve para achegar novas formas de creatividade ao deseño e á moda", explicou Fernández Lores durante a presentación. Do mesmo xeito, o rexedor local engadiu que actividades coma esta "poñen a Pontevedra no mapa do encaixe de todo o Estado".

Pola súa banda, Esperanza Marín, presidenta da Asociación A Fieitiña, explicou que haberá obradoiros de encaixe ao longo dos días que dura o encontro. Nas xornadas do venres e do sábado haberá cursiños de encaixe moderno, de guipur policromado, do encaixe típico de Eslovenia e un taller para aprender a representar cadros en encaixe.

Cun custo de 50 euros por día e inscrición previa en [email protected], terá unha capacidade máxima para 10 persoas por curso e día. As persoas interesadas deberán levar o seu material de traballo a excepción dos fíos, facilitados pola asociación organizadora. O prazo de inscrición remata o 14 de maio.

Xa o propio domingo realizaranse as exhibicións dos traballos das palilleiras no Recinto Feiral, cunha xornada que comezará ás 10.00 horas cunha pausa para xantar. O propio Pazo da Cultura acollerá unha comida de todos os participantes cun custo de 15 euros que é preciso ingresar previamente na conta ES69 2080 0530 71 3040012191 de A Banca. No ingreso é indispensable poñer o nome e a cantidade de comensais para organizar a distribución das mesas.

A Fieitiña celebra a arte de palillar
Comentarios