As II Xornadas TurisTIC da Deputación congregaron este mércores a máis de 200 persoas para escoitar a expertos procedentes de todo o Estado especializados no eido da xestión turística intelixente dos destinos. A presidenta provincial, Carmela Silva, que interveu na mesa redonda A colaboración público-privada dos DTI xunto a David Regades, delegado da Zona Franca de Vigo; Fernando Fraile, director xeral do ICTE, e Javier Yagüe, responsable do Sistema de Xestión TIC no aeroporto de Vigo, fixo fincapé na importancia dun compromiso entre a Administración pública e o sector público e privado, en sumar sinerxías e en apostar polas TIC no turismo. "As administracións temos que ser referencias do cambio e as TIC son os grandes instrumentos para que o noso país non siga neste proceso de despoboamento", asegurou.
Silva tamén incidiu na necesidade de seguir apostando polo aeroporto de Vigo; polo turismo "das emocións e experiencias" e pola calidade, lembrando que Pontevedra é a provincia galega con máis distintivos Q e que "esta Deputación é a única administración galega no proxecto de desenvolvemento dunha Rede de DTI para España".
Pola súa banda, David Regades explicou iniciativas que está a impulsar a Zona Franca para fomentar a cultura das TIC de forma colaborativa, como os edificios intelixentes e o 5G, e incidiu na "necesidade de impulsar o turismo industrial". Sobre proxectos de futuro tamén falou Javier Yagüe, que adiantou aspectos nos que está a traballar o Aeroporto de Vigo para converterse nun Smart Aeroport e enmarcados na iniciativa de edificios intelixentes, no 5G, no recoñecemento facial, na realidade aumentada ou no Design Thinking.
Así mesmo, Fernando Fraile fixo un percorrido por colaboracións público-privadas de éxito desenvolvidas dende o nacemento das Q de Calidade e salientou que a suma de sinerxías tamén debe darse entre entidades públicas e no ámbito privado.
O segundo relatorio contou coa participación da xefa de proxectos de Segitur, Edurne Vidal; o xerente de desenvolvemento de produtos de Aenor e o experto en turismo e presidente de Spain Live Music, Iñaki Gaztelumendi, nunha mesa moderada por David Villar, líder de Especialización e Gobernanza de CTIC Asturias. Todos eles profundizaron na Gobernanza dentro dos Destinos Intelixentes e debateron sobre "o exceso da información" na sociedade actual e sobre a importancia de "mellorar a xestión e a capacidade analítica".
A mesa Innovación aplicada á comercialización turística, conducida pola directora dos Paradores de Cambados e Pontevedra, Meritxell Marcos, reuniu ao director da división en liña Halcón Viaxes-Globalia, Marco Táboas; a Anna Borduzha, membro da empresa Mabrian, e a David González, da empresa Perfeqto. Entre outros temas, sinalaron a "importancia do asociacionismo no sector hostaleiro" e sinalaron que "estamos ante un novo paradigma de comercialización, enfrontámonos a un cliente complicado que o que quere é vivir experiencias".
O proxecto Desafío Domingo Fontán, vencedor do I Hackathon DESTInno
As II Xornadas TurisTIC incluíron a entrega dos premios do Hackathon DESTInno, impulsado para recoñecer as mellores solucións tecnolóxicas encamiñadas a fortalecer a eficiencia dos destinos turísticos. O proxecto Desafío Domingo Fontán (no que participaron Celso Gómez Corbal, Luis Eduardo Castro e Jarold Meléndez Lugo) acadou o primeiro premio, Niiru logrou o segundo e Rondar o terceiro.
