As obras de remodelación das dependencias municipais situadas na planta baixa de Michelena 30, que teñen por obxectivo garantir a seguridade de funcionarios e cidadáns no marco da crise sanitaria, implican que o Rexistro e o Padrón deberán ser trasladados temporalmente á Casa da Luz.
Na mañá deste luns operarios municipais comezaron os traballos de traslado deste servizo ás dependencias ubicadas na Praza da Verdura.
OBRA. Segundo anunciou a portavoz do goberno local, Anabel Gulías, os traballos de reforma en Michelena foron adxudicadas á firma Dapercons por un orzamento de 164.560 euros, tras consultar a tres empresas locais.
A intervención, cuxo inicio está previsto para o próximo luns, 18 de maio, ten por obxectivo reformular os espazos municipais e individualizar os postos de traballo para que en todo momento respéctese a distancia de seguridade ampliada ata os dous metros, así como que se poidan mellorar os fluxos de circulación da planta
"TRABALLANDO DESDE O PRIMEIRO DÍA". No primeiro anuncio da obra, a principios de mes, o alcalde de Pontevedra, Miguel Anxo Fernández Lores, puxo en valor o labor realizado polos traballadores municipais para afrontar os cambios motivados pola situación de alarma. "Levamos traballando desde o primeiro día", dixo.
"Esta actuación enmárcase na protección de saúde e da seguridade tanto dos funcionarios e funcionarias como dacidadanía que fai uso das instalacións municipais", engadiu o rexedor local, que lembrou que durante esta crise revisouse a totalidade de locais municipais e establecido as medidas necesarias para respectar a distancia de seguridade tanto a través da reorganización dos espazos como mediante a colocación de biombos e outros elementos.
O alcalde sinalou ademais que esta reforma "responde a unha das prioridades deste mandato que é a modernización e a axilización da Administración local" e destacou que estas modificacións "veñen para quedar", polo que ademais de reformular os espazos físicos manterase o actual sistema de citas previas e a atención por videoconferencia.