A subdelegada do Goberno en Pontevedra, Maica Larriba, presidiu este luns o acto de entrega da Medalla ao Mérito da Seguridade Viaria ao subtenente do Subsector de Tráfico de Pontevedra José Luis Crespo Crespo, nun acto sobrio, marcado polas medidas de seguridade sanitaria, e ao que asistiron o coronel xefe da Comandancia, Simón Venzal; o coronel xefe do Sector de Galicia, Francisco Javier Molano; o comandante inspector de Servizos do Sector de Galicia (e anterior xefe do Subsector pontevedrés), Leovigildo Villares; o capitán xefe do Subsector de Tráfico da Garda Civil, Antonio Pérez; e o xefe provincial de Tráfico accidental, Miguel Rogel.
Larriba quixo, en primeiro lugar, amosar o seu recoñecemento ao galardoado, poñendo en valor "a súa traxectoria, de máis de 30 anos servindo na agrupación de Tráfico, e na que concorren unha serie de valores e méritos máis que salientables". Estendeu, asimesmo, o seu agradecemento "a todos e todas as axentes do Subsector de Tráfico de Pontevedra, que día a día vixían as nosas estradas para garantir a seguridade viaria".
Neste sentido, destacou que "as nosas mulleres e homes do Subsector de Tráfico da Garda Civil están nas nosas estradas para auxiliarnos, axudarnos e para disuadir a aqueles que non son capaces de cumprir as normas, pero, ademais, nos últimos meses veñen desenvolvendo un traballo con motivo das restricións de mobilidade impostas pola pandemia que quero agradecer especialmente".
A subdelegada do Goberno tamén lembrou que o vindeiro domingo conmemorase o día internacional en recordo das vítimas de accidentes de tráfico, "unha lacra na nosa sociedade que eleva os falecidos e feridos graves a cifras que non podemos soportar".
CAUSANTES. Na provincia de Pontevedra a tipoloxía do accidente segue tendo dos factores comúns, os despistes e a velocidade inadecuada. Respectar as indicacións de velocidade e a sinalización son condutas esenciais para garantir a seguridade na estrada, así como evitar as distraccións e o uso do móbil durante a condución, tal e como lembrou Larriba.
A concesión das Medallas ao Mérito á Seguridade Viaria prodúcese de acordo ao fixado no Decreto 2464/74, de 9 de agosto, que establece a necesidade de honrar ou premiar aquelas condutas que "entrañan unha importante achega á seguridade viaria, teñan un notorio relevo na salvagarda de esta ou constitúan un exemplo encomiable para os demais".
