A loita contra o ‘"cancro’" do kiwi en Pontevedra xera interese internacional

Establecer métodos de diagnóstico e de control da bacteria PSA –Pseudomonas Syringe Actiniadiae– que afecta ás plantacións de kiwi galegas desde o 2011 é unha das principias liñas de investigación que ten aberta o laboratorio da Estación Fitopatolóxica do Areeiro (EFA). E coñecer o estado deste traballo foi o obxectivo principal da visita que onte realizaron ás súas instalacións máis de 60 persoas que participarán a vindeira semana na 35 Conferencia Internacional do Kiwi. 

As enfermidades de orixe bacteriano no cultivo do kiwi son a primeira causa de perdas económicas, principalmente o ‘cancro bacteriano’ causado pola bacteria PSA, polo que desde O Areeiro estase a traballar activamente na súa caracterización, bioloxía, métodos de diagnóstico e de control. A esta investigación súmanse os estudos agronómicos, e en especial fitopatolóxicos, que permiten dar conta do estado sanitario das plantacións, e que tamén se amosaron no nomeado percorrido. Esta visita forma parte das actividades previas á conferencia que terá lugar hoxe e mañá na Illa da Toxa e que contará coa participación de representantes dos países da IKO -International Kiwifruit Organitation-: Francia, Italia, España, Grecia, Estados Unidos, Nova Zelandia, Corea e Chile. 

A PRODUCCIÓN GALEGA. Desde o inicio da actividade da EFA en 1980, o estudo da patoloxía do kiwi foi unha das súas liñas prioritarias. Este cultivo iniciouse en Galicia en 1960, e a día de hoxe a produción de kiwi na comunidade supón o 80 por cento da produción total do Estado, mentres que a superficie dedicada a este cultivo sitúase no 70 por cento. Debido á demanda dos ‘kiwicultores’ e dos viveiristas para dispoñer de material vexetal adecuado para as plantacións comerciais, iniciouse un programa de caracterización morfolóxica, xenética e agronómica de plantas estaminíferas e pistiliferas de kiwi. Outra das liñas de estudo é a mellora das propiedades organolépticas relacionadas coa textura e dozura do froito maduro 

En colaboración con algunhas empresas do sector, estase a facer un seguemento da fenoloxía de diversas plantacións co obxectivo de caracterizar o seu ciclo vexetativo e determinar o momento óptimo da aplicación de fertilizantes, produtos fitosanitarios e reguladores, poda, anelado, apoio da polinización e aclareo. Por último, tamén se realizan estudos para mellorar o tamaño do froito e o seu número por planta, coa aplicación de diversas substancias para mellorar o calibre, con distintas técnicas de cultivo e coa aportación de polen.