Como unha reivindicación da memoria rural fronte ás présas e os ritmos das cidades e contra a desmemoria e a "soberbia contemporánea que nos fai esquecer de onde vimos". Con esa vocación chega a Pontevedra a exposición A vida lenta, un proxecto da Obra Social de Abanca que conxuga fotografía, audiovisual, poesía e música nunha reflexión sobre o rural galego, coordinada polo director, guionista e produtor Aser Álvarez.
A mostra abarca imaxes fotográficas de tres fondos diferentes (o Ministerio de Agricultura, o arquivo persoal do fotógrafo Carlos Valcárcel e a colección de Jaume Lloveras e Juan Piñeiro Andión) que se combinan cos sons da Galicia rural seleccionados por Moisés Quintas, que elaborou unha banda sonora para a mostra con alalás, instrumentos tradicionais e sons como o renxer dun carro ou a roda dun muíño moendo.
Na exposición, que pode verse no Café Moderno ata o 15 de xaneiro, tamén se inclúen entrevistas con persoas destacadas que traballan no ámbito rural como Elena Ferro ou Javier Olleros, vídeos do rural galego e fragmentos de poemas dalgúns dos poetas gañadores do Premio de Poesía Afundación dos últimos anos.
O Café Moderno presenta hoxe un proxecto expositivo de Aser Álvarez. O director, guionista e produtor galego inaugura ‘A vida lenta. Memorias e ritmos do rural galego’. VÍDEO: GONZALO GARCÍA pic.twitter.com/5vr9g01aip
— Diario de Pontevedra (@Diario_Pontev) October 20, 2021
"Este é un bo momento para reflexionar sobre os ritmos lentos que amosan estas fotos e os valores que podemos extraer das mesmas", explicaba este mércores a coordinadora da Área de Cultura de Afundación, Marité Cores.
Pola súa banda, Aser Álvarez sinalou que "baixo a etiqueta rural simplifícase unha enorme riqueza e diversidade" e esta mostra pretende amosar todas as Galicias rurais, dende a costa ao interior. Por outra parte, tamén Aser indicou o necesario que é contribuír á reflexión arredor de certas preguntas como "cal é o ritmo de vida que levamos, como nos afecta esta crise do mundo rural que ten un carácter planetario, cales son as respostas aos desequilibrios e desigualdades sociais e cara a que futuro camiñamos".
Na presentación da mostra participou tamén o musicólogo Moisés Quintas, que explicou que parte dos sons extintos no rural galego, polo uso de novas ferramentas e maquinaria ou pola fin de certos traballos, foron recollidos do arquivo do Consello da Cultura Galega para formar parte desta mostra.
Do mesmo xeito, explicou que os alalás que se reproducen nas salas expositivas son composicións antigas que proveñen dos cantos gregorianos e mesmo fixo unha exhibición dos instrumentos musicais máis vellos, todos de orixe pastoril, tocando unha caramela (frauta elaborada co corno dun animal) e outras frautas elaboradas con canas, cerámica ou ósos de cabrito.
