Os peches de polígonos bateeiros por presenza de biotoxinas adoitan ser habituais nesta época?
Si, non deixa de ser unha posibilidade como outra e nesta época non é sorprendente ter episodios de marea vermella. Con datos do mércores, estaban pechadas algo máis do 80% das bateas de Galicia e, polo que vemos nas análises, pode que o 20% restante tamén estea a piques de pechar, polo tanto é un episodio forte, pero dentro da normalidade. Non hai que esquecer que se trata dun fenómeno natural. As rías teñen un pulso, por así dicilo, e ese pulso proporciona a alimentación aos moluscos e aos demais seres que habitan no mar, pero hai momentos nos que, se non teñen a saída normal polo motivo que sexa, pódese ver afectado dando lugar a estes episodios de mareas vermellas. É a natureza en estado puro.
Estanse producindo actualmente máis episodios de marea vermella que os que había no pasado ou mantense a mesma dinámica de sempre?
Temos feito unha análise comparativa interesante na que vimos que o ano pasado tivemos un episodio de marea vermella a comezos de ano e iso si que foi diferente ás series históricas anteriores. Pero con respecto a se hai máis ou menos, estamos na mesma situación de sempre.
Que supoñen estes paróns para o sector desde un punto de vista económico?
O feito de que sexa un fenómeno natural implica que sabemos o que temos e como temos que traballar, pero iso non significa que este non sexa un parón que chega xustamente nun momento no que o mexillón está no seu punto óptimo para ser retirado das bateas e comercializado. Tendo en conta isto, se este episodio de peche ten unha duración excesivamente longa, iso pode afectar negativamente ao sector, porque sempre corremos o risco de que, se hai tormentas ou temporais, o mexillón polo seu peso poida desprenderse das cordas e perderse. Nós cruzamos os dedos e esperamos que este sexa un episodio coma tantos outros e que nun período curto de tempo poidamos ter abertos de novo os polígonos. O mexillón que non sae hoxe porque están os polígonos pechados por toxina, se esta remite e as analíticas dan ben, en tres días poderíase estar comercializando outra vez sen ningún problema.
O produto que está agora mesmo no mercado é con toda seguridade totalmente apto para o consumo
O mexillón que está no mercado, pódese consumir con todas as garantías?
Si. O mexillón de Galicia é un dos moluscos que teñen un maior control sanitario para acceso ao consumidor final. Os produtos que están agora mesmo no mercado teñen pasado moitísimos máis controis dos que podemos imaxinar e con toda seguridade son totalmente aptos para o consumo.
No caso da D.O.P. ‘Mexillón de Galicia’, teñen problemas de competencia desleal, é dicir, de venda fraudulenta de produto foráneo simulando ser galego, como padecen por exemplo sectores como o da ameixa?
Iso é algo contra o que combatimos. Traballamos para que o recoñecemento que ten o produto galego polo bo saber facer dos bateeiros, das empresas conserveiras, etcétera, teña un traslado ao consumidor final. Son de sobra coñecidas diversas accións que temos levado a cabo no pasado dende o Consello Regulador de cara á protección da marca e seguimos mantendo un control dos mercados todo o estrito que podemos. Realizamos toda a presión que podemos para que as cousas se fagan ben, porque iso redunda en confianza do consumidor final e en beneficio da xente que traballa este produto, que, en definitiva, é a que merece os parabéns.
Para iso hai uns etiquetados que son os que garantizan e certifican que se trata de Mexillón de Galicia, non?
Sempre. É un dos aspectos fundamentais. O consumidor ten que ter garantía do que está a comprar no seu punto de venda e que cando chegue á casa non se leve unha sorpresa. Cando é galego, leva o selo de mexillón de Galicia.
Galicia é unha grandísima potencia en produción de mexillón. Cantos dos bateeiros da comunidade autónoma están incluídos actualmente dentro do Consello Regulador?
Galicia é a segunda produtora mundial de mexillón para consumo humano, só por detrás de Chile. China é a primeira produtora, pero o seu mexillón non vai destinado a consumo humano. En Galicia hai algo máis de 2.100 bateas e a día de hoxe un pouco máis do 60% dese total están integradas no Consello Regulador. Nese sentido aínda nos queda traballo por facer para ampliar esa porcentaxe.
Cal é a produción anual media galega de mexillóns?
Uns 250 millóns de quilos.