Máis protestas dos veciños de Monte Porreiro. A Asociación O Mirador decidiu nunha asemblea convocada na noite do pasado venres que continuará manifestándose para que o Concello invista na mellora do barrio.
A primeira cita de protesta será este luns mesmo, durante a celebración do Pleno ordinario do mes de novembro. "Sabemos que non poderemos entrar ao interior, pero imos estar nos arredores para levar as nosas reivindicacións", sinala o presidente de O Mirador, Carlos Diéguez.
Por outra parte, a asociación tamén convoca unha manifestación en Pontevedra o vindeiro 27 de novembro, que partirá da ponte dos Tirantes para continuar pola avenida de Boa Aires, subir por Cobián Roffignac ata a rúa Michelena e rematará ante o Concello.
VER MÁS: O Mirador de Monte Porreiro pide reunirse con Lores y amenaza con protestas
"Pedimos que se manteña o investimento no barrio e que se melloren as beirarrúas que están en malas condicións porque o parcheado que se está facendo agora mesmo nas estradas de Monte Porreiro está mal feito",sinala Diéguez.
O conflito entre os veciños de Monte Porreiro e o Concello comezou cunha proposta de peonalización da rúa Alemaña por parte do Goberno local. O departamento de Obras presentou un proxecto que non gustou aos veciños e provocou protestas e unha recollida de sinaturas contra o mesmo. Deste xeito, o Concello deu marcha atrás e paralizou o proxecto.
Porén, agora os veciños piden que os dous millóns de euros previstos para aquela intervención se manteñan realizando outras melloras. Neste sentido, O Mirador pide reunirse co alcalde e critica ao concelleiro de Obras por "querer tratar outros problemas para distraer, como as carreiras na rúa Dinamarca".