NOVAS ou xa dunha idade. Do rural de Pontevedra ou da zona tirando a urbana. Nunha palabra: rururbanas. Así son as 104 protagonistas das imaxes que desde este xoves presidente as paredes da Facultade de Belas Artes, as ventás da vella Casa Consistorial, a cristaleira de acceso á sede da Vicerreitoría do campus (Casa das Campás) e o chan da propia praza de España.
Estes retratos a gran tamaño de mulleres do rural galego foron realizados por 25 estudantes de Belas Artes. En colaboración coa Unidade de Igualdade da Universidade de Vigo e o Concello de Pontevedra, 7H Cooperativa Cultural desenvolveu onte na cidade a instalación artística efémera Inside Out: Mulleres [Rur]Urbanas, a primeira iniciativa inserida no proxecto de arte urbana máis grande do mundo que se leva a cabo en Galicia.
Esta instalación efémera foi presentada pola concelleira de Igualdade, Paloma Castro; a integrante da cooperativa 7H Carla Rodríguez e por Alegría Campos, unha das alumnas de Belas Artes que realizou esta serie de retratos que presentan a mulleres de distintas idades, procedencias e ocupacións.
"Utilizamos a arte urbana para visibilizar a forza das mulleres"
"Partimos dun proxecto internacional, que comezou o fotógrafo e artista urbano JR coa idea de responder á pregunta de ser a arte pode cambiar o mundo", salientou Rodríguez, coordinadora desta iniciativa inserida no proxecto Inside Out, que diferentes colectivos levaron a cabo en máis de 1.800 localizacións de máis de cen países desde 2011. Neste caso, Mulleres [Rur]Urbanas ten como obxectivo "homenaxear ás mulleres do rural" e a súa contribución ao desenvolvemento colectivo "desde ese anonimato falsamente construído», apuntou Rodríguez, que lembrou tamén que o proxecto "foi posible grazas á implicación" de 35 estudantes de Belas Artes, dos que 25 son autores das fotografías que ocupan o espazo público da cidade.
Paloma Castro, pola súa banda, explicou que se pretendeu "utilizar a arte urbana para visibilizar a forza das mulleres do contorno rural, pero tamén urbano do municipio. Canta máis arte levemos á rúa máis poderemos visibilizar a igualdade".