O Museo de Pontevedra continúa cos trámites previos ao proxecto de rehabilitación dos seus edificios centrais, os que están na Praza da Leña, e a súa conexión a través dun soto. Despois de que a Xunta eximise ao Concello da evaluación ambiental para modificar o Plan Especial de Protección e Reforma Interior e Conservación Artística (Peprica), un paso imprescindible para poder realizar as obras, a institución museística vén de facer público que contratou un estudo de patoloxías actualizado sobre eses tres inmobles, pechados ao público dende 2014. Son o Castro Monteagudo, o García Flórez e o Fernández López. O obxectivo, segundo se indica a través dunha nota de prensa, é "coñecer ao detalle e de maneira actualizada todas as súas deficiencias".
A Deputación lembra, a través do vicepresidente da institución, César Mosquera, que xa existía un estudo previo, "que deixaba claro que o estado dos inmobles era moi malo", e engade que, de cara a redactar o proxecto final de rehabilitación, é preciso coñecer de maneira actualizada e ao detalle a súa situación real a día de hoxe.
"Os edificios están en estado ruinoso, iso sábese, pero hai que ver e concretar se aparte das deficiencias visibles xa detectadas existen outros problemas que afecten aos seus elementos principais", en palabras de Mosquera facilitadas pola Deputación, organismo do que depende o Museo.
10.000 EUROS. O estudo das patoloxías foille adxudicado á empresa Ideas TX Enxeñería, elixida entre dez firmas. O orzamento é de 10.690 euros e comezarase a súa execución cando rematen os trámites administrativos.
O anuncio da realización do estudo de patoloxías faise uns días despois de que a Dirección Xeral de Calidade Ambiental non considerara necesario someter a procedemento de avaliación ambiental a modificación puntual do Peprica para a conexión soterrada dos inmobles da Leña. O departamento autonómico subliñou que non se prevén efectos ambientais significativos o que, a efectos prácticos, despexa o camiño para as obras.
"A solución técnica que se presentara pódese facer. Agora hai que ver a dispoñibilidade orzamentaria e se é preciso axustar", destacou Mosquera, para insistir en que "para darlle uso aos inmobles é necesario adaptalos á normativa actual en materia de accesibilidade e seguridade".
O vicepresidente defende, ante as críticas que o proxecto recibiu por parte da delegación de Pontevedra do Colexio Oficial de Arquitectos de Galicia (COAG) e dun colectivo veciñal, que a única maneira de que as edificacións manteñan a súa funcionalidade expositiva é a través dunha conexión subterránea.
