O novo Consello Asesor do Museo de Pontevedra decidiu por unanimidade cambiar a súa imaxe corporativa. Desta maneira, a institución prescinde do logotipo que se viña usando ata o momento, inspirado nun debuxo do arquitecto Alejandro de la Sota, e anuncia a convocatoria dun concurso de ideas. Entre as propostas que se presenten, o propio consello asesor escollerá a que lle pareza máis apropiada.
Anunciouno este luns o vicepresidente da Deputación, César Mosquera, nun paréntese da que foi a primeira reunión oficial do Consello Asesor, que durou catro horas (das dez da mañá ás dúas da tarde) e na que tamén se falou da rehabilitación dos edificios da Praza da Leña, da construción dun novo centro arqueolóxico en Valdecorvos e da programación de 2020.
"Hai unha sensación xeral de que ao Museo hai que darlle un cambio moi profundo. Temos unha historia coas súas luces e sombras. Pero o pasado, pasado está", dixo Mosquera. "Herdamos o museo máis importante de Galicia e un dos máis importantes do Estado, pero hai que darlle un novo impulso. Niso hai total acordo".
A pesar de non contar cun logotipo nin unha imaxe corporativa oficial, o Museo viña usando tradicionalmente un debuxo de 1942 do arquitecto Alejandro de la Sota (Premio Nacional de Artes Plásticas e Premio Nacional de Arquitectura). Este mesmo Goberno da Deputación colocou esta imaxe hai dous anos (2018) nun espazo central do Sexto Edificio.
O vicepresidente anunciou que se convocaría cun concurso de ideas dirixido a deseñadores para "crear" a nova imaxe do Museo. "Porque, en realidade, case non existía. O que se viña usando era un debuxo que non fora creado como logo e que ten certas disfuncionalidades". A súa intención é que se poida contar coa nova imaxe, que debe reflectir "este momento de renovación" no que se está, "en tres ou catro meses".
Da reunión do Consello Asesor tamén saíu o acordo de vincular o Museo ao Camiño Portugués. Preguntado polos xornalistas sobre que actuacións concretas se farían neste sentido, o director da institución, José Manuel Rey, sinalou que esta actuación tiña que ver coa súa idea de transformar o de Pontevedra nun museo máis social. "A idea é que Pontevedra é un área de paso importantísimo. O Museo debe aproveitar iso".
Mosquera asistiu a esta reunión, xunto ao secretario da Deputación, Carlos Cuadrado; o director do Museo, José Manuel Rey (que lles expuxo aos membros do consello as liñas centrais do proxecto co que gañou o concurso para a dirección da institución), e a xefa administrativa, Sonia Mateos. O Consello Asesor está formado pola arqueóloga Beatriz Comendador; o empresario das industrias culturais Kin Martínez; a directora de Esdemga, Lola Dopico; o crítico de arte Ramón Rozas; a arquitecta Teresa Táboas e o pedagogo e escritor Xaime Toxo. Tamén forma parte a artista Menchu Lamas, que o luns non puido acudir á reunión.