Os 58 concellos da provincia de menos de 50.000 habitantes van ter actuacións enmarcadas no proxecto Musigal 2020, financiado pola Deputación con 614.045 euros. A Xunta de Goberno da institución provincial aprobou onte o listado de actuacións solicitadas polos gobernos locais, a maioría das cales se desenvolverán no verán (en xullo haberá 20 concertos e en agosto 17).
Cada concello ten dereito a unha única actuación dos grupos musicais profesionais que abordan de xeito específico contidos sociolingüísticos e de dinamización da lingua galega e que fan música en galego nos seus concertos (ou, no caso dos instrumentais, que teñen pezas de autoría galega).
O primeiro concerto de Musigal 2020 terá lugar nas Neves o 10 de abril, no que actuarán Xabier Díaz e Adulfeiras de Salitre, mentres que a última actuación será en Portas o 1 de decembro, a cargo de Andrea Pousa.
Os concellos solicitaron 21 formacións musicais. Os grupos que van contar cun maior número de actuacións son Óscar Ibáñez & Tribo, Sés e Xabier Díaz e Adulfeiras de Salitre. Estarán en cinco concellos diferentes.
Programa Musigal 2020 pretende contribuír á difusión e á promoción da música galega e en galego nos concellos da provincia e, ao mesmo tempo, fomentar o uso e a normalización social da lingua galega e a defensa dos valores da igualdade de xénero.
Musigal 2020 —que está dividido nas categorías de Son muller, Son crianza, Son tradición, Son clásico e Son actual— nace co obxectivo de "favorecer a programación artística por parte dos concellos e, ao mesmo tempo, dinamizar a lingua galega", sinalou onte a presidenta provincial, Carmela Silva.
"É moi complicado —engadiu- que un concello pequeno, como Portas, Dozón ou Fornelos, poidan ter unha actuación de esta calidade se non hai unha administración que a fomente".