viernes. 04.12.2020 |
El tiempo
viernes. 04.12.2020
El tiempo

O negocio minorista aposta polo comercio 3.0 para saír da crise

Fachada de Comercial Limeres, un dos maiores exemplos de reorientación aos nosos tempos. DP
Fachada de Comercial Limeres, un dos maiores exemplos de reorientación aos nosos tempos. DP
Dez empresas da provincia inician mañán unha nova iniciativa de SmartPeme utilizando as novas tecnoloxías e a presenza en Internet

Renovarse ou morrer. Baixo esa máxima, moitos negocios están reorientando a súa actividade para adaptarse ós novos tempos, especialmente trala crise provocada pola covid-19. A Deputación, a través do seu programa SmartPeme, está a botar unha man ás iniciativas máis destacadas para que sirvan como exemplo e modelo a seguir a outros empresarios.

A institución que preside Carmela Silva vén de seleccionar 10 proxectos dos máis de 20 que se presentaron a esta aceleradora do tecido empresarial e que destacan por responder a ideas de negocio novidosas e polo intento de explorar novos nichos e oportunidades.

Trátase de empresas minoristas que buscan adaptarse rapidamente á "nova normalidade", utilizando ao máximo os recursos e posibilidades do e-commerce. O perfil das persoas emprendedoras seleccionadas é maioritariamente feminino, pois entre os empresarios hai seis mulleres e catro homes. Entre elas hai dende negocios que comezan, a outros que se reorientan aproveitando as súas potencialidades e singularidades e se reparten por distintas localidades da provincia.

Agora teñen por diante un intenso traballo de titorías e obradoiros nos que se lles guiará no uso de tendas online, pasarelas de pago e venda de produtos con recursos tecnolóxicos. Ata o próximo 30 de setembro recibirán "mentorización", sesións de titoría con expertos en tecnoloxía, competitividade empresarial e imaxe dixital, ademais de capacitación con obradoiros específicos.

Karina Kova

É unha clínica médico estética creada en 2016 en Pontevedra e que agora busca reorientarse abandonando o apartado médico e centrándose no estético, con especialización en tratamentos faciais e corporais. A aceleradora prestaralle axuda para mellora-lo seu posicionamento local e na creaciónd unha tenda online.

Comercial Limeres

Exemplo claro dun negocio tradicional que se reorienta. Dedícase á venda de lámpadas decorativas en Pontevedra dende 1976. Dispón de clientela fidelizada e non é raro que reciba a xente que busca modelos concretos que viron en redes sociais. Dende SmartPeme consideran que este sector está pouco explotado no comercio online, polo que hai oportunidades de e-commerce.

Tolf

Tenda de roupa feminina de Pontevedra con marcas exclusivas e deseños especiais nacida en outubro. Agora trabállase coa súa responsable na creación dunha web, unha tenda online e apoio para a xestión das redes sociais.

Tipi Fiestas Galicia

É unha nova empresa de eventos, radicada en Nigrán, que vai facer dos tipis indios e da decoración temática o seu sinal de identidade. Con esta óptica pretende organizar vodas, bautizos e outras cerimonias.

Foodies and travellers

Tenta apoiarse, dende a súa sede en Mos, no turismo gastronómico para promocionar a empresas de alimentación e de bebidas españolas, tanto no mercado nacional como no estranxeiro. A súa estratexia pasa tamén por agrupar tenda e motor de reserva nun só sitio web.

Blaurtopías

É un proxecto vigués de venda online de obxectos de artesanía como ilustracións, cerámica e serigrafía. O seguinte paso será dar unha maior visibilidade a todo o proceso de creación.

Broderie

É un proxecto artesanal nacido en Ponteareas e centrado no deseño e creación de produtos destinados aos máis cativos e feitos a man: fadas, bonecas, guirnaldas, camisetas...

Infusiónate

Negocio lalinense que apostou pola venda de tes e infusións a granel. A aceleradora de SmartPeme está axudándolle a crear unha web, a posicionarse en Google, xestionar márketing dixital e lanzar unha nova liña de produto.

SS3 Professional

Dedícase dende Mos á comercialización de deterxentes biodegradables e ecolóxicos. Coa crise da Covid19 creou novas liñas de produtos como desinfectantes, xeles hidroalcólicos e máscaras.

Tamerlán

Radicada en Vigo, adícase á limpeza e restauración de alfombras a través de procesos tecnolóxicos innovadores. Traballa, fundamentalmente, para tintorerías, pero buscan chegar tamén ao cliente final. Con SmartPeme avanzarán no marketing dixital.

O negocio minorista aposta polo comercio 3.0 para saír da crise
Comentarios