"Este non é un día de celebración, é un día de reivindicación"

Janet Novás coa cara manchada de bágoas negras loitaba chea de rabia contra un inimigo invisible, durante o mediodía deste mércores, na Praza da Peregrina. "Hai que berrar ben alto para que se nos escoite, sobre todo nestes momentos", explicou a creadora sobre o seu traballo. "Para min este é un berro de liberdade e de forza para que as mulleres saiban que non están soas".

Janet Novás durante a súa performance. DAVID FREIRE
 

Novás foi a encargada de inaugurar coa súa performance Feelings o ciclo de intervencións artísticas Violencia Zero, da Deputación. Fíxoo no que foi o acto central do Día Contra a Violencia Machista en Pontevedra, unha convocatoria da institución provincial á que se sumou o Concello e que reuniu a ducias de persoas no centro da cidade, con máscaras e gardando distancia de seguridade. "Este non é un día de celebración, é un día de reivindicación", indicou a presidenta da Deputación, Carmela Silva.

Ademais da acción de Janet Novás, na Peregrina volveuse escoitar o manifesto que, co gallo do 25-N, o Concello lle encargou á xornalista de Diario de Pontevedra Sara Vila. "Estamos fartas de minutos de silencio. De feito, precisamos quebrar cos silencios cómplices na familia e entre a veciñanza. Temos que falar de como nos relacionamos en parella e para iso é fundamental educación", sinalou a xornalista.

Sara Vila le o seu manifesto na Praza da Peregrina. DAVID FREIRE

APLAUSOS. Sara Vila foi interrompida por aplausos cando fixo unha referencia explícita ao papel que deben xogar os homes na loita contra a violencia machista. "Urxen varóns que deteñan unha cadea de mensaxes vexatorias sobre unha compañeira nun grupo de WhatsApp, que rebatan argumentos que xustifican a violencia contra as mulleres, que se planten fronte aos agresores".

No mesmo acto da Peregrina, Carmela Silva reclamou igualdade real e, como Novás e Vila, pediu alzar a voz contra a violencia machista. "Estamos fartas de violencia. Non o soportamos máis. Non cremos no silencio, cremos nos berros", dixo despois de indicar que a violencia que sofren as mulleres "non é unha enfermidade nin unha pandemia, e os machistas asasinos non son enfermos".

A presidenta lembrou que, segundo a Onu, 243 millóns de mulleres e nenas que sufriron violencia no mundo este ano. "Hai que cambiar este modelo. Esiximos a metade de todo porque somos a metade", indicou Silva. "A violencia machista nace de que a metade da poboación, as mulleres, vivimos subordinadas á metade que domina. Nace do feito de que non vivimos nun espazo de igualdade. E cando nos empoderamos e non admitimos a subordinación, hai unha forma de dominación para que volvamos ao rego, que é a violencia".

Pola súa banda, o alcalde pediu seguir prestando atención a esta lacra social. "A violencia machista non pode pasar a un segundo plano baixo ningunha circunstancia. Que siga existindo avergóñanos e indígnanos".

Maica Larriba lendo o manfiesto detrás da concentración da CIG. DAVID FREIRE
 

SUBDELEGACIÓN. Exactamente á mesma hora que se celebraba o acto da Peregrina tamén se celebraba o da Praza de España. Alí coincidían dúas convocatorias: a da Subdelegación do Goberno, que consistía na lectura dun manifesto institucional por parte de Maica Larriba, e a dunha concentración da Confederación Intersindical Galega (CIG). A situación derivou nun pequeno caos cando a subdelegada tratou de realizar a súa intervención sen micro xusto por detrás das sindicalistas, que remataron por enviar posteriormente aos medios un comunicado no que aclaraban que tiñan permiso para facer a concentración a esa hora e lle pedían explicacións a Larriba pola coincidencia.

A CIG aproveitou o 25-N este ano para denunciar a situación das coidadoras. "Descoidar a quen coida é violencia machista", sinalaron. Pola súa banda, Maica Larriba pediu combater o machismo e condenar socialmente todas as actitudes, prácticas e condutas que consenten a violencia contra as mulleres.

O Colectivo Feminista Pontevedra non realizou ningún acto debido á pandemia, pero emitiu un comunicado lembrando que "a violencia machista non cesa".

Concienciación nas escolas

Unha xornada completa de actos conmemorativos, que incluíron unha instalación de cruces de pau e unha charla do alumno Joshua Alonso, fillo de Sesé Mateo (asasinada en 2017), foi a que celebrou este mércores o Centro de Formación Profesional da Xunqueira, o único de Galicia no que se pode cursar o Ciclo Superior en Igualdade de Xénero.

Este centro educativo puxo unha especial atención na conmemoración do 25-N e en aproveitar a data para realizar actividades de concienciación sobre a violencia de xénero entre o estudantado, pero non foi o único.

O CEIP A Xunqueira I, por exemplo, acolleu un contacontos a cargo de Polo Correo do Vento e charlas, tanto para os alumnos de máis idade de Primaria como para os pais. As actividades estaban organizadas pola Anpa Celso Emilio Ferreiro coa colaboración do centro.

Pola súa banda, o colexio Froébel sumouse á conmemoración do Día Contra a Violencia Machista, entre outras cousas, cunha intervención de color morado no exterior do edificio.

Finalmente, a comunidade educativa do IES Montecelo realizou un acto de recordo as víctimas. "Unha árbore coas follas secas era o punto de partida, onde un grupo de alumnos e alumnas ían depositando unha folla verde en substitución dunha seca, ao tempo que se ían lendo nomes de cada unha das vítimas do 2020", explica o instituto. "A folla verde representaba o recordo e o respecto a cada unha delas".