Que Rosalía de Castro deixe de ser "unha estrada" e se converta nunha rúa con todos os estándares de calidade urbana do centro de Pontevedra. Ese é o obxectivo do proxecto para a vía presentado este venres polo edil de Obras, Demetrio Gómez, que explicou os plans para converter o segundo tramo da rúa principal do barrio de Mollavao nunha vía dun único carril, con beirarrúas máis amplas e pequenas prazas con zonas verdes e bancos. O proxecto terá un custo de 1.792.586 euros.
Porén, o comezo das obras terá que agardar ata que se poida construír o novo vial do barrio. Que comunicará Rosalía de Castro coa Avenida de Marín para desviar o tráfico. "Non imos poñer un único sentido para Rosalía de Castro ata que se poida empregar o novo vial", explicaba Gómez, xa que moitos veciños terían que facer un gran rodeo para acceder aos seus domicilios. O comezo das obras para construír a conexión depende aínda de Costas, que debe aprobar a concesión dos terreos polos que pasará a nova rúa.
O concelleiro destacou a intención de levar a Mollavao materiais de calidade pa
ra equiparalo co tratamento que reciben as rúas do centro urbano. Así, as beirarrúas recibirán un tratamento en formigón como o de Arcebispo Malvar ou a Ponte do Burgo, renovarase por completo o mobiliario urbano e o alumeado e crearanse zonas de estancia, como pequenas prazas, a fin de cambiar o aspecto de estrada de paso da zona.
A primeira destas zonas de estancia será creada á porta do colexio Salvador Moreno, onde "os nenos sexan os protagonistas e os vehículos sexan respectuosos". Nesta zona instalarase unha plataforma máis elevada para o carril de tráfico semellante á existente ante o CEIP Álvarez Limeses.
Do mesmo xeito, na intersección entre Rosalía de Castro e as rúas Licenciado Molina e Benito Vicetto crearase unha praza con bancos e espazos verdes. "Nese tramo desaparece o carril de circulación e colocaremos un pavimento de granito, a solución máis nobre", contaba Gómez.
A nosa intención é avanzar na tramitación do proxecto para ter todos os pasos dado cando poidamos comezar
Por outra parte, reordenarase o entorno da Casa do Mar, cun lavado de cara da rúa Simón Bolívar, a creación dunha zona verde baixo a ponte da autoestrada e a creación dun novo aparcamento de borde no circuito de seguridade vial que actualmente ocupa o lugar.
A nova Rosalía de Castro será unha rúa na que só se poderá circular no sentido de saída da cidade, contará cun carril e dúas beirarrúas. Os pasos de peóns estarán elevados, con lombos, para facilitar o paso aos viandantes, tal e como indicou na rolda de onte Demetrio Gómez.
Aínda que será preciso agardar para o comezo das actuacións, o edil dixo que o Concello irá dando os pasos para gañar tempo e poñerse a traballar "en cuestión de días" unha vez sexa posible coordinarse coas obras do novo vial do barrio. "A nosa intención é sacar xa esta obra a tramitación para ter todos os pasos dados no momento no que se poida comezar ao día seguinte de rematar o vial" explicaba onte o concelleiro.
Esta obra completa unha serie de actuacións no entorno do barrio que modificarán o seu estado actual como a construción do citado vial ou o novo paseo peonil a Marín, así como unha serie de proxectos urbanísticos en tramitación.
