viernes. 04.12.2020 |
El tiempo
viernes. 04.12.2020
El tiempo

Novo paso cara ao transporte a demanda coa contratación do estudo previo e a app

Grupo de taxis parados nunha rúa de Pontevedra.
Grupo de taxis parados nunha rúa de Pontevedra.
Empresas do estranxeiro puxéronse en contacto co Concello para interesarse polos pregos do contrato para a creación da aplicación

A portavoz do Goberno local, Anabel Gulías, anunciou este luns que a Xunta de Goberno local aprobou o inicio da contratación administrativa tanto do estudo e proposta de explotación do transporte a demanda como da aplicación informática que establecerá o seu funcionamento. Gulías lembrou que o proxecto é "unha aposta deste mandato que cremos que vai marcar un antes e un despois na mobilidade deste Concello", polo que o inicio da contratación administrativa destes dous expedientes supón "o pistoletazo de saída".

O estudo e proposta de explotación do transporte colectivo a demanda sae a licitación cun orzamento de contratación de 102.850 euros e cun prazo de execución de once meses. Segundo explicou Gulías, este estudo permitirá "analizar como se comporta a mobilidade sobre todo nas parroquias para poder buscar solucións acaídas". Neste sentido, lembrou que a proposta de viabilidade e sostibilidade da explotación do servizo de transporte a demanda precisa "dun encaixe dentro da lexislación".

Paralelamente, tamén se pon en marcha a licitación da aplicación informática que vai establecer como vai funcionar o mecanismo de transporte. Esta plataforma sae a licitación por un importe de 297.460 euros e conta cun prazo de execución de 21 meses. Neste apartado, Anabel Gulías informou que, durante o proceso de elaboración dos pregos, se puxeron en contacto co Concello empresas estranxeiras interesadas en participar no proceso.

Anabel Gulías asegurou que a previsión é que ambas contratacións estean adxudicadas e que comecen a executarse cara finais deste ano. Por outra banda, tamén informou que desde o Concello se espera ás reunións coa Xunta de Galicia para que a reformulación do transporte público de Pontevedra, que estivo parada pola crise sanitaria e polas eleccións, se retome e mesmo que este sexa un tema a tratar na próxima reunión entre o alcalde e o presidente da Xunta.

O proxecto A implantación dun modelo de transporte colectivo a demanda mediante vehículos de baixa capacidade encádrase nos obxectivos previstos no Programa Operativo de Crecemento Sostible FEDER 2014-2020 e da Estratexia de Desenvolvemento Urbano Sostible (EDUSI) Máis Modelo Urbano Pontevedra, coa que o Concello de Pontevedra acadou os fondos do Fondo Europeo de Desenvolvemento Rexional (FEDER).

Novo paso cara ao transporte a demanda coa contratación do estudo...
Comentarios